MOISÉS xraj xok pa ri tinamit Canaán kukʼ ri täq israelitas. Rumal laʼ xubʼij: ‹Jehová, chaya chwe kinqʼaxej ri nimalaj jaʼ (bʼeyaʼ) ubʼiʼ Jordán, rech kinwil ri utzalaj ulew›, xchaʼ. Tekʼuriʼ ri Jehová xubʼij: ‹¡Xaq matchʼaw chik! ¡Xaq mabʼij chi wariʼ!› Xchaʼ che. ¿La awetaʼm suche xubʼij wariʼ Jehová?

Are rumal ri xbʼantajik chiʼ ri Moisés xuchʼay ri abʼaj. Masach pa ajolom che: Moisés xuqujeʼ ri Aarón xkeya ta uqʼij ri Jehová. Xkebʼij ta che ri tinamit che are Jehová xesan lo ri jaʼ chupam ri abʼaj. Rumal laʼ Jehová xubʼij che kuya ta chike keʼok pa ri tinamit Canaán.

Chiʼ qʼaxnäq chi kebʼ oxibʼ ikʼ che kamnäq che ri Aarón, Jehová xubʼij che Moisés: ‹Chakʼama bʼi ri Josué chuwäch ri Eleazar ri ajkojol tabʼal toqʼobʼ xuqujeʼ che kiwäch ri tinamit. Tekʼuriʼ chilaʼ. Che kiwäch konojel, chabʼij chike che Josué are ri kʼakʼ ajkʼamal bʼe›, xchaʼ. Moisés xubʼan chike ri xubʼij ri Jehová che, chawilampeʼ pa ri wachbʼäl.

Tekʼuriʼ Jehová xubʼij che Josué: ‹Chabʼana ko che ri awanimaʼ, maxibʼij awibʼ. Kakʼam bʼe pa kiwiʼ ri täq israelitas tekʼuriʼ cheʼakʼama bʼi pa ri tinamit Canaán che xintzujuj chiwe, in katintoʼ›.

Tekʼuriʼ Jehová xubʼij che Moisés che kbʼe puwiʼ ri juyubʼ (jïbʼ) ubʼiʼ Nebo, rech ri ulew Moab. Chilaʼ Moisés xkunik xril panoq naj che ri nimalaj jaʼ (bʼeyaʼ) Jordán ri utzalaj ulew Canaán. Jehová xubʼij wariʼ: ‹Are waʼ ri tinamit xintzujuj chike ri kalkʼwal ri Abrahán, Isaac xuqujeʼ ri Jacob. Xinya chawe rech kawil panoq, Tekʼuriʼ kinya ta chawe katok chilaʼ›.

Ri Moisés xkam pa ri juyubʼ (jïbʼ) Nebo. Kʼo chi 120 ujunabʼ. Kʼo na uchoqʼabʼ xuqujeʼ kkaʼy na. Ri tinamit sibʼalaj xbʼisonik, konojel xeʼoqʼ chirij ri Moisés. Tekʼuriʼ xekikotik che Josué are ri kʼakʼ ajkʼamal bʼe chike.