MOISESQA Israelpa mirayninwanmi Canaan allpaman yaykuyta munan. Chaymi nirqa: ‘Jehová Diosnilláy Jordan Mayuta chimpaykachiway, chay allin allpata qawaykunaypaq’ nispa. Jehová Diosñataqmi nirqa: ‘¡Amaña masta chaymantaqa parlapayawaychu!’ nispa. ¿Yachankichu imanasqataq Jehová Diosqa chaynata nirqa?

Moises qaqata waqtaspa rurasqanmanta. Yuyariy: Moiseswan Aaronqa manam Jehová Diostaqa hatuncharqakuchu. Runakunamanmi mana nirqakuchu Jehová Diosqa qaqamanta yakuta pawachisqanta. Chaymi Jehová Diosqa Canaan allpaman mana yaykunankupaq nirqa.

Hinaptin Aaronpa wañusqanmanta manaraq achka killakuna pasaruptin, Jehová Diosqa Moisesta nirqa: ‘Josueyta akllaspayki sayachinki sacerdote Eleazarpa hinaspa huñunasqa llapallan runakunapa qayllanpi. Paykuna qawachkaptinkumá paytaña kasukunakupaq kamachinki’ nispa. Dibujopi qawasqaykiman hinam Jehová Diospa nisqantam Moisesqa rurarqa.

Hinaptinmi Jehová Diosqa Josueyta nirqa: ‘Kallpanchakuspayá qarinchakuy. Qanmi kay runakunata pusanki hinaspa prometesqay Canaan allpaman yaykuchinki, ñoqapunim qanwanqa kasaq’ nispa.

Chaymantam Jehová Diosqa Moisesta nirqa Moab runakunapa allpanpi Nebo orqoman seqananpaq. Chaymantam Moisesqa Jordan mayupa waklawnintaraq qawayta atirqa hinaspa qawarqa kuyayllapaq Canaan allpata. Chaymi Jehová Diosqa nirqa: ‘Kay allpatam Abrahanman, Isaacman hinaspa Jacobman jurarqani chaynapi paykunapa mirayninkunaman qonaypaq. Kikikipuni qawaykunaykitam munarqani ichaqa manam yaykunkichu’ nispa.

Nebo orqopim Moisesqa wañukurqa 120 watanpi. Wañukusqankama kallpanpas mana pisirqachu chaynataqmi ñawinkuna allintaraq qawakurqa. Hinaptinmi Israelpa mirayninkuna Moisesmanta llakikurqaku hinaspa waqarqaku. Chaywanpas Josueyña kamachiqninku kaptinmi kusikurqaku.