MOZESE akhafuna kupita m’Kanani na Aisrayeli. Natenepa iye aphemba: ‘Yahova, ndisiyeni ndiwambuke Nkulo wa Yoridani kuti ndione dziko yadidi.’ Mbwenye Yahova alonga: ‘Pyakwana! Leka longa pontho ipi!’ Kodi musadziwa thangwi yanji Yahova alonga pyenepi?

Ndi thangwi ya pidacitika mudamenya Mozese mwala. Kumbukani kuti iye na Aroni hadalemedza Yahova tayu. Iwo nee apanga mbumba kuti akhali Yahova akhabulusa madzi pa mwala. Na thangwi ineyi Yahova alonga kuti nee mbadaatawirisa kupita m’Kanani.

Natenepa, mudapita miezi yakucepa Aroni mbadamala kufa, Yahova apanga Mozese: ‘Kwata Yobzwa umulimirise pamaso pa nyantsembe Eleazara na mbumba. Penepo pamaso pawo, panga onsene kuti Yobzwa ndi ntsogoleri mupswa.’ Mozese acitadi pidampanga Yahova, ninga munaonemwe pa cithunzithunzi cino.

Buluka penepo Yahova apanga Yobzwa: ‘Khala wakuwanga, leka gopa. Unadzatsogolera Aisrayeli kupita m’dziko ya Kanani idaapikira ine, pina ndinadzakhala na iwe.’

Patsogolo pace Yahova apanga Mozese kuti akwire kuntsonga ya Phiri ya Nebo m’dziko ya Moabi. Na kweneko Mozese akwanisa kuona ntunda unango wa Nkulo wa Yoridani mbaona dziko yakubalika ya Kanani. Yahova alonga: ‘Iyi ndi dziko idapikira ine kupasa ana a Abrahamu, Isaki na Yakobo. Ndakusiya kuiona, mbwenye sinadzakusiya kuipita tayu.’

Kweneko kuntsonga ya Phiri ya Nebo Mozese afa. Iye akhali na piaka 120 pyakubalwa. Iye akhali wakuwanga basi, na maso ace akhaona mwadidi. Mbumba yatsukwala kakamwe mbilira thangwi Mozese afa. Mbwenye akomerwa kukhala na Yobzwa ninga ntsogoleri wawo mupswa.