MUSE Isiraeelete manni ledo Kanaˈˈaani gobba eara hasiˈrino. Konni daafira, ‘Yordaanoosi Laga tayise sae, dancha gobba laeemmo gede fajjie’ yee Yihowa xaˈmiri. Yihowa kayinni, ‘Layinkita konne coye kayissootie!’ yiisi. Yihowa togo yiinohu mayiraatiro afootto?

Muse siqqotenni kincho gani wote ikkinorinniiti. Hakkawote isinna Aarooni Yihowara ayirrinynye uyitinokkita qaagi. Kinchu giddonni waa fushshanni noohu Yihowa ikkinota mannaho dikultino. Konni korkaatinni Yihowa insa Kanaˈˈaani eˈara difajjino.

Aarooni reyihunni shiima yanna gedensaanni Yihowa Muse, ‘Iyyaasu haadhe kakkalaanchu Alaazaarinna Isiraeelete manni albaanni uurranno gede assi. Insa baalunku albaanni, haaru massagaanchi Iyyaasu ikkinota woˈmunkura kuli’ yiisi. Misilete aana laˈˈattonte gede, Museno Yihowa yiinosi gede assi.

Hakkiinnino Yihowa Iyyaasu togo yiisi: ‘Bareeda ikki; waajjitooti. Aammonsara qaale eoommota Kanaˈˈaani gobba Isiraeele massagge eessatto; anino ledokki ikkeemmo.’

Gedensaannino Yihowa, Muse Moaabi gobbara heeˈrannoha Naabawu Ilaala giddanno gede kulisi. Museno hakko guunxote heeˈre Yordaanoosi Laga widoogise biifado Kanaˈˈaani gobba lai. Yihowano, ‘Abirahaami, Yisaaqinna Yaaqoobi oosora aammora qaale eoommo gobba tenneeti. Atino laˈˈattora fajjoommohe; hakka eattora kayinni difajjeemmohe’ yiisi.

Muse Naabawu ilaalira heeˈrenni reyi. Isira reyi wote 120 diro ikkinosi. Reyi barri geeshsha jawaataho; qoleno illesi dijaanjurtino. Muse reyita mannu lowo geeshsha dadille wiˈli. Iyyaasu haaro massagaanchonsa ikkita kayinni hagiidhi.