43-нҗи хекая

Ешув Сердар белленйәр

МУСАНЫҢ ысрайыллылар билен Кенган юрдуна гиреси гелйәр. Шонуң үчин ол: «Ехова, Иордан дерясыны гечип, бу аҗайып юрды гөрмәге маңа ругсат бер» дийип хайыш эдйәр. Эмма Ехова оңа: «Бесдир, муны менден гайдып сорама!» диййәр. Ехованың нәме үчин шейле җогап беренини билйәңми?

Муса хасасыны гая уранда болан затлары ядыңа сал. Харун икиси дагдан сувы Ехованың берендигини айтмадылар ве Оны шөхратландырмадылар. Шонда Ехова онуң Кенган юрдуна гирмеҗегини айдыпды.

Ине, Харуның өлүминден соң бирнәче ай геченде, Ехова Муса йүзленип: «Ешувы Элиязар руханының ве халкың өңүне чыкар. Инди Ешув сердар болар дийип, хеммелериң өңүнде ыглан эт» диййәр. Сурата серет, Муса Ехованың айдышы ялы эдйәр.

Соңра Ехова Ешува йүзленип: «Мерт бол, горкма. Сен ысрайыллылары мениң вада берен ериме, Кенган юрдуна алып барарсың, мен сениң билен боларын» диййәр.

Шондан соң Ехова Муса Моаб юрдундакы Небо дагына чыкмалыдыгыны айтды. Муса дагың депесинден Иордан дерясының аңырсындакы аҗайып Кенган юрдуны гөрйәр. Ехова оңа: «Ине, Ыбрайымың, Ысхагың ве Якубың чагаларына мениң вада берен юрдум. Сен бу юрды гөрдүң, эмма оңа гирмерсиң» диййәр.

Шол Небо дагының депесинде Муса арадан чыкды. Ол 120 яшындады. Эмма ол хенизем сагдынды, гөзи-де говы гөрйәрди. Мусаның өлүмине халк гаты гынанып, яс тутяр. Муңа гарамаздан, халк Ешувың сердар боланына бегенйәрди.

Чыкыш 27:12—23; Кануның гайталанышы 3:23—29; 31:1—8, 14—23; 32:45—52; 34:1—12.