NA‘E fiema‘u ‘e Mōsese ke ‘alu mo e kau ‘Isilelí ki Kēnani. Ko ia na‘á ne kole: ‘⁠Sihova, tuku au ke u kolosi ‘i he Vaitafe Sioataní, pea ke u mamata ‘i he fonua leleí.’ Ka na‘e pehē ‘e Sihova: ‘⁠Kuo fe‘unga! ‘Oua na‘a ke toe lea ‘o kau ki he me‘á ni!’ ‘Okú ke ‘ilo hono ‘uhinga na‘e lea pehē ai ‘a Sihová?

Ko hono ‘uhingá ko e me‘a na‘e hoko ‘i hono taa‘i ‘e Mōsese ‘a e maká. Manatu‘i, ko ia mo ‘Ēlone na‘e ‘ikai te na fakalāngilangi‘i ‘a Sihova. Na‘e ‘ikai te na tala ki he kakaí ko Sihova na‘á ne ‘omai ‘a e vai mei he maká. ‘I he ‘uhinga ko ‘ení na‘e pehē ai ‘e Sihova he‘ikai te ne tuku kinaua ke hū ki Kēnani.

Ko ia ‘i ha ngaahi māhina si‘i pē hili ‘a e mate ‘a ‘Ēloné, na‘e tala ‘e Sihova kia Mōsese: ‘ ‘Ave ‘a Siōsiua, pea fokotu‘u ia ‘i mu‘a ‘ia ‘Eliesa ko e taula‘eikí pea mo e kakaí. Pea ‘i mu‘a ‘iate kinautolu kotoa, tala ki he taha kotoa pē ko Siōsiua ‘a e taki fo‘ou.’ Na‘e fai ‘e Mōsese ‘o fakatatau mo e lea ‘a Sihová, ‘o hangē ko ia ‘okú ke sio ki ai ‘i he fakatātā.

Pea na‘e toki tala ‘e Sihova kia Siōsiua: ‘⁠Ke ke mālohi, pea ‘oua te ke ilifia. Te ke taki ‘a e kau ‘Isilelí ki he fonua ko Kēnani ‘a ia na‘á ku tala‘ofa kiate kinautolú, pea te u kau mo koe.’

Ki mui mai, na‘e tala ‘e Sihova kia Mōsese ke ne kaka ki he tumutumu ‘o e Mo‘unga ko Nepó ‘i he fonua ko Mōapé. Na‘e lava ‘a Mōsese ke sio mei ai ‘o laka atu ‘i he Vaitafe Sioataní ki he fonua faka‘ofo‘ofa ko Kēnaní. Na‘e pehē ‘e Sihova: ‘⁠Ko e fonua ‘eni na‘á ku tala‘ofa ke foaki ki he fānau ‘a ‘Ēpalahame, ‘Aisake, mo Sēkopé. Kuó u tuku ke ke sio ki ai, ka he‘ikai te u tuku ke ke hū atu ki ai.’

‘I he funga Mo‘unga ko Nepó na‘e mate ai ‘a Mōsese. Na‘e ta‘u 120 hono motu‘á. Na‘á ne kei mālohi pē, pea na‘e kei lelei pē ‘ene sió. Na‘e loto-mamahi ‘aupito ‘a e kakaí mo tangi koe‘uhi ko e mate ‘a Mōsesé. Ka na‘a nau fiefia ‘i he hoko ‘a Siōsiua ko honau taki fo‘oú.