Makani 43: Josyuwa Waba Musololi
MUSA uyanda kunjila mu Kenani abana Isilayeli. Aboobo walomba kuli Jehova, wati: ‘Jehova, ndilomba kuzabuka Mulonga wa Jodano nkabone nyika mbotu. Pele Jehova wati: ‘Mbubo ndamvwa! Alimwi nditakumvwi kabili kwaamba makani aaya!’ Hena ulicizyi Jehova ncaakaambila boobo?
Nkaambo kaceeco Musa ncaakacita naakauma bbwe. Koyeeya kuti, Musa a Aloni tiibakamulemeka Jehova. Tiibakabaambila bantu kuti ngu Jehova wakapa kuti meenda azwe mubbwe. Akaambo kaceeci, Jehova wakati takabalekeli kuti banjile munyika ya Kenani.
Aboobo kwiinde myezi miniini Aloni kafwide, Jehova waambila Musa kuti: ‘Bweza Josyuwa umwiimike kumpela lya Eliyaza mupaizi alimwi akubantu. Kumpela lyabo boonse, ubaambile kuti Josyuwa ngomusololi mupya.’ Musa wacita mbweena Jehova mbwaamulailila mbuli mbobona acifwanikiso.
Kumane Jehova waambila Josyuwa kuti: ‘Koyuma, utayoowi! Uya kubasololela bana Isilayeli akubanjizya munyika ya Kenani njindakabasyomezya alimwi ndina kuli aanduwe.’
Kumane Jehova waambila Musa kutanta atala lya Cilundu ca Nebo munyika ya Mowabu. Kali atala, Musa ulakonzya kubona kutala lya Mulonga wa Jodano akubona nyika mbotu ya Kenani. Jehova wati: ‘Eeyi nenyika njindakasyomezya kupa bana ba Abbulahamu, Izaka a Jakobo. Ndakutondezya mbwiibede nyika, pele toko kunjila pe.’
Kacili atala lya Cilundu ca Nebo, Musa wafwa. Wakali amyaka iili 120. Wakacijisi nguzu alimwi wakacili kubona kabotu. Bantu bausa kapati alimwi bamulila Musa. Pele balikkomenyi kuti Josyuwa waba musololi wabo mupya.
Myeelwe 27:12-23; Deuteronomo 3:23-29; 31:1-8, 14-23; 32:45-52; 34:1-12.
Mibuzyo
- Mbabaani bantu bobilo acifwanikiso baimvwi a Musa?
- Ncinzi Jehova ncaamwaambila Josyuwa?
- Nkaambo nzi Musa ncaatantila atala lya Cilundu ca Nebo, alimwi ncinzi Jehova ncaamwaambila?
- Wakajisi myaka yongaye Musa naakafwa?
- Nkaambo nzi bantu ncobauside, alimwi nkaambo nzi ncobeelede kukkomana?
Mibuzyo aimwi
- Bala Myeelwe 27:12-23.
Mulimo nzi mupati Josyuwa ngwaakapegwa kuli Jehova, alimwi mbuti Jehova mbwabalanganya bantu Bakwe sunu? (My. 27:15-19; Inc. 20:28; Heb. 13:7)
- Bala Deuteronomo 3:23-29.
Nkaambo nzi Jehova ncaatakabaleka ba Musa a Aloni kunjila munyika yakasyomezyegwa, alimwi nciiyo nzi ncotukonzya kwiiya kumakani aaya? (Dt. 3:25-27; My. 20:12, 13)
- Bala Deuteronomo 31:1-8, 14-23.
Mbuti majwi aa Musa ngaakaamba kubana Isilayeli mbwaatondezya kuti cakulibombya wakalutambula lulayo lwakazwa kuli Jehova? (Dt. 31:6-8, 23)
- Bala Deuteronomo 32:45-52.
Mbuti Jwi lya Leza mbolyeelede kubujatikizya buumi bwesu? (Dt. 32:47; Lev. 18:5; Heb. 4:12)
- Bala Deuteronomo 34:1-12.
Nekuba kuti Musa taku naakamubona Jehova ameso, mbuti Deuteronomo 34:10 mbwatondezya cilongwe ncaakajisi a Jehova? (Kul. 33:11, 20; My. 12:8)
