МОИСЕ́Й изра́ильчилер-биле кады Ханаа́нче кириксеп турар. Ынчангаш ол дилеп турар: ‘Иегова, Иорда́н хемни кежип, бо кайгамчык черни көөрүн меңээ чөпшээреп көрем’. Ынчалза-даа Иегова: ‘Болзун! Моон соңгаар ооң дугайында меңээ сагындырба!’ — деп чугаалаан. Иегова чүге ынчаар харыылааныл, билир сен бе?

Ынчангы Моисе́йниң хая соп турганы таварылга дээш. Сактып кел даан, олар Ааро́н-биле Иегованы алдаржытпайн барган болгай. Хаядан сугну Иегова үндүрүпкен деп, олар чонга чугаалаваан. Ханаа́н черинче кирерин оларга чөпшээревес деп чүвени, Иегова ынчан чарлаан.

Ааро́н мөчээнден бээр каш ай эрткенде, Иегова Моисе́йге дужааган: ‘Иисус Навинни алгаш, дээди бараалгакчы Елеаза́рның болгаш чоннуң мурнунга тургус. Ынчангаш моон соңгаар Иисус баштыңчы болур деп, шупту чоннуң мурнунга чарла’. Чурукче көрем: Моисе́й Иегованың дужаалын ол ёзугаар күүседип турар.

Ооң соонда Иегова Иисуска мынча дээн: ‘Туруштуг бол, кортпа. Сен изра́ильчилерни аазааным Ханаа́н черинче киирер сен, а мен сээң-биле кады турар мен’.

Ооң соонда Иегова Моисе́йни Моав черинде турар Нево́ деп дагның шыпшык бажынче үнерин дилеп турар. Ооң бедиинден Моисе́й Иорда́нның ындында турар кайгамчык чараш Ханаа́н черин көрүп каан. ‘Авраа́мның, Исаа́ктың база Иа́ковтуң ажы-төлүнге аазааным чер бо-дур. Сен ону көрген сен, ынчалза-даа ынаар кирбес сен’,— деп, Иегова чугаалаан.

Нево́ деп дагның бажынга Моисе́й өлген. Ол 120 харлыг турган. Ынчалза-даа ол ам-даа кадык-шыырак, карааның көөрү эки турган. Чон Моисе́йниң чок апарганынга кажыыдап, ажыын ажып ыглап турар. Ынчалза-даа олар Иисус Навин деп чаа баштыңчылыг апарганынга өөрүп турар.