Mwaha 43: Yoxuwa Onnikhala Muhooleli
MOISE oniphavela okela oKanani ni anaIsarayeli. Siiso oniveka wira: ‘Yehova, kihiyeeni kilapuwe Muroo Yordani, nto kawehe elapo yooreera.’ Masi Yehova onihimya wira: ‘Vaaphiyerya! Muhitthikele-tho ohimya ela!’ Nyuwo munnisuwela nthowa naya Yehova onihimya awe siiso?
Nthowa na yeele yiiranen’ye vaavo Moise vaamanne awe vamwala. Muupuweleke, owo ni Aroni khiyaamuttittiminhe Yehova. Awo khiyaalenle atthu wira aari Yehova yoowo aakuminhe maasi vamwala. Mwaha wa yeela Yehova onihimya wira owo khonrowa waahiya awosa okelaka muKanani.
Siiso miyeeri vakhaani nuumala okhwa Aroni, Yehova onimuleela Moise wira: ‘Mmukuxe Yoxuwa, nto mmweemexe ohoolo wa Eleyazari namukuttho ni wa atthu. Nto vale vahoolo va atthu otheene, muhimye wa ori otheene wira vano Yoxuwa tori muhooleli a niinano.’ Moise onniira ntoko siiso Yehova sihimmya awe, ntoko siniwerya anyu woona valataratoni.
Nuumala vo Yehova onimuleela Yoxuwa wira: ‘Mulipihe murima, ni muhikhale oowoova. Nyuwo munrowa waahoolela anaIsarayeli okela elapo ya oKanani ntoko saaleihenrya aka awosa, nto miyo kinrowa okhala ni nyuwo.’
Vattuli vaya Yehova onimuleela Moise wira owele vasuluu vaMwaako Nebo elapo ya oMowabi. Oryeene vale Moise onniwerya woona okhopela wa Muroo Yordani ni onniweha elapo yooreera ya oKanani. Yehova onihimya wira: ‘Ela elapo yeele yaaleihenrya aka waavaha anamwane a Abrahamu, Isakhi ni Yakobe. Kihoohiyani wira moone ela, masi nkinrowa woohiyani okela mme.’
Vale vasuluu va Mwaako Nebo, Moise onnookhwa. Owo aarina iyaakha 120. Nlelo aari oolipa, nto meitho awe nlelo yaanoona saana. Atthu arii ooriipiwa murima vanceene ni anninla mwaha wa okhwa Moise. Masi awo arii oohakalala okhalana Yoxuwa ntoko muhooleli aya a niinano.
Mothakoni 27:12-23; Otumererya 3:23-29; 31:1-8, 14-23; 32:45-52; 34:1-12.
Makoho
- Valataratoni va, tanii alopwana ala anli yeemenle ni Moise?
- Exeeni Yehova enimuleela awe Yoxuwa?
- Nthowa xeeni Moise vaniwela awe vasuluu va Mwaako Nebo, nto Yehova onimuleela exeeni?
- Moise orina iyaakha kavii vaavo vanikhw’awe?
- Nthowa xeeni atthu ary’aya ooriipiwa murima, masi nthowa xeeni nrina aya wira ahakalaleke?
Makoho oowuncererya
- Mmusome Mothakoni 27:12-23.
Muritti xeeni muulupale yoowo Yoxuwa aakhenly’awe wa Yehova, nto moota xeeni Yehova onooniherya awe waakhapelela atthu Awe olelo? (Moth 27:15-19; Mit 20:28; aHeb 13:7)
- Mmusome Otumererya 3:23-29.
Nthowa xeeni Yehova ohaamweemerenrya awe Moise ni Aroni olapuwa arowaka elapo yooleiheriwa, ni exeeni nniwerya ahu wiixutta mwa yeela? (Otum 3:25-27; Moth 20:12, 13)
- Mmusome Otumererya 31:1-8, 14-23.
Moota xeeni masuu oolaxerya a Moise wa Isarayeli anooniherya aya wira owo aahaakhela moowiiyeveiha yoolaka ya Yehova? (Otum 31:6-8, 23)
- Mmusome Otumererya 32:45-52.
Masuu a Muluku yaahaana ovara moota xeeni ikumi sahu? (Otum 32:47; Onam 18:5; aHeb 4:12)
- Mmusome Otumererya 34:1-12.
Hataa Moise ahaatonko onweha mwaneene Yehova, Otumererya 34:10 onooniherya exeeni voohimya sa wataana wawe ni Yehova? (Okhum 33:11, 20; Moth 12:8)
