Tantara 43

Josoa Nanjary Mpitariky

MOSESY mba ti handeha ta Kanana niaraka tamin’Israelita aby io. Ke izy niera: ‘Mba ambilà kony zaho Jehovah hitsaka Ten̈aranon’i Jordana, baka iô hahita tany tsara zen̈y e.’ Jehovah nivolan̈a: ‘Basy! Kaza ampody aminakahy eky zen̈y!’ Mba hainao nan̈ino Jehovah nivolan̈a zen̈y?

Tamy Mosesy namepiky vato in̈y fo nahavy zen̈y. Tsiaronao, izy ndreky Arona tsy nan̈amia voninahitry Jehovah. Irô tsy nivolan̈a tamin’olo fa Jehovah nan̈aboaka rano tamy vato in̈y. Zen̈y nahavy Jehovah tsy nan̈aomba irô hengo amy tany Kanana.

Fanjava maromaro tafaran’ny nahafatesan’Arona amy zay, Jehovah nivolan̈a tamy Mosesy: ‘Alaiva Josoa, atsangàna alohan’Eleazara mpisôron̈o ndreky olo jiaby. Ambarà olo jiaby amy zay fa Josoa mpitariky vaovao.’ Mosesy nan̈ano raha jiaby nivolan̈in’i Jehovah taminany, karaha hitanao amy sary io.

Jehovah amy zay nivolan̈a tamy Josoa: ‘Man̈anaova lelahy tsarabe, kaza mavozo. Anao hitariky Israelita aby io amy tany Kanana efa nivolan̈iko amian̈a irô. Zaho tsy han̈ary anao.’

Jehovah baka iô nan̈iraka Mosesy hanonga amy tendron’ny Bongo Nebo, amy tany Moaba. Izikoa izy fa tan̈abon’ny bongo tan̈y, nitazan̈a andaforen’ny Ten̈aranon’i Jordana ndreky hatsaran̈an’ny tany Kanana. Jehovah nivolan̈a: ‘Io tany nivolan̈iko amian̈a taranak’Abrahama, Isaka, baka iô Jakoba zen̈y. Nambelako anao mahita izio, fa anao tsy himboako miditry an̈y.’  

Tamy tendron’ny Bongo Nebo io tan̈y Mosesy naty. Izy tamy zen̈y 120 taon̈o. Izy tamy zen̈y mbala natanjaka, masonany mbala nahita tsarabe. Olo jiaby nalahelo ndreky nitomoan̈y Mosesy koa fa naty. Irô fo ravoravo nahazo Josoa, mpitariky irô vaovao.

Nomery 27:12-23; Deoteronomia 3:23-29; 31:1-8, 14-23; 32:45-52; 34:1-12.