Historia 43

Josué guca xaíque

MOISÉS racalaʼdxiʼ chuʼ Canaán ne ca israelita. Ngue runi nabe: Jiobá, bidii lugar tiideʼ guiiguʼ Jordán ca para guuyaʼ layú sicarú ca. Peru Jiobá na rabi laabe: ¡Maʼ! ¡Cadi guibiguetaʼ guiniʼluʼ zacá! Nannuʼ xi pur ndiʼ gudxi Jiobá laabe zacá la?

Pur ni guca ora Moisés bigaze xpara lu guié que. Bietenalaʼdxiʼ: laabe ne Aarón qué ñusisacadíʼcabe Jiobá. Qué ñabidíʼcabe ca binni guidxi que de que Jiobá nga gulee nisa lu guié que. Ngue runi Jiobá na qué zudii lugar chúʼcabe Canaán.

Ngue runi despué de guti Aarón la? Jiobá gúdxibe Moisés: Gucuaa Josué ne bizuhuaa laabe nezalú Eleazar ni ruzaaquiʼ guʼxhuʼ ne nezalú ca binni guidxi ca. Ne raqué, nezalú guirácabe la? guníʼ de que Josué nga ni chigaca xaíque. Moisés runi cásipeʼ guníʼ Jiobá, casi ruuyuʼ lu dibuju ca.

Óraque na Jiobá rabi Josué: Guca naguidxi, ne cadi guidxibuʼ. Lii chineluʼ ca israelita ca ne uguuluʼ laacabe Canaán, guidxi ni maʼ bizaberuaa gudiéʼ laacabe, ne naa ziuaaniáʼ lii.

Despué la? Jiobá rabi Moisés quiʼbaʼ dede luguiáʼ dani láʼ Nebo ni nuu lu layú stiʼ Moab. Dede raqué Moisés zanda guuyaʼ jma chericaʼ de guiiguʼ Jordán que ne guuyabe layú sicarú stiʼ Canaán. Jiobá na: Ndiʼ nga layú ni bizaberuaa gudiéʼ ca xiiñiʼ Abraham, Isaac ne Jacob. Maʼ bidiéʼ lugar guuyuʼ ni, peru qué zudiéʼ lugar chuʼluʼ luni.

Lu dani láʼ Nebo que guti Moisés dxi napa 120 iza. Naguídxirube ne ruuyarube galán. Ca binni guidxi que nabé triste riuucaʼ ne guiracaʼ ruunacaʼ pur Moisés. Peru riéchecabe gápacabe Josué casi xaíque cubi stícabe.

Números 27:12-23; Deuteronomio 3:23-29; 31:1-8, 14-23; 32:45-52; 34:1-12.