DELIKADO an buhay kan mga lalaking ini. Kaipuhan nindang makadulag, ta kun dai, magagadan sinda. Mga espiyang Israelita sinda, asin an babaying nagtatabang sainda iyo si Rahab. Nakaistar siya sa harong sa may lanob kan siyudad nin Jerico. Aramon ta kun ta’no ta nameligro an mga lalaking ini.

Handa na an mga Israelita na magbalyo sa Salog nin Jordan palaog sa Canaan. Pero bago kaiyan, nagsugo si Josue nin duwang espiya. Sinabi niya sainda: ‘Manmanan nindo an Jerico asin an palibot kaiyan.’

Pag-abot kan mga espiya sa Jerico, nagdagos sinda sa harong ni Rahab. Pero may nag-usip sa hadi kan Jerico: ‘Duwang Israelita an nagdigdi ngunyan na banggi para magmanman.’ Pakadangog kaini, nagsugo an hadi nin mga tawuhan asin sinabi ninda ki Rahab: ‘Iluwas mo an mga lalaking nasa harong mo!’ Pero, itinago ni Rahab su mga espiya sa bubungan kan harong niya. Sinabi niya: ‘May nagdigdi man nanggad na mga lalaki, pero dai ko aram kun sain sinda hali. Naghali sinda kan padiklom na, bago isara an pinto kan siyudad. Dali, ’baad abutan pa nindo sinda!’ Kaya linapag kan mga lalaki su mga espiya.

Pagkahali ninda, dali-daling nagsakat si Rahab sa bubungan. ‘Aram kong itatao saindo ni Jehova an dagang ini,’ an sabi niya sa mga espiya. ‘Nabaretaan mi kun paano niya pinamara an Dagat na Pula, asin kun paano niya ginadan an mga hading si Sihon asin Og. Nagin maray ako saindo, kaya nakikiulay ako, magin maray man kamo sako. Iligtas nindo an sakuyang ama asin ina, saka an mga tugang ko.’

Nangako an mga espiya na gigibuhon ninda ini, pero may dapat gibuhon si Rahab. ‘Ibugkos mo sa may bintana an pulang pising ini,’ an sabi kan mga espiya, ‘tapos tipunon mo digdi an gabos mong paryente. Pag sinalakay mi na an Jerico, mahihiling mi an pising ini sa bintana nindo asin mayo kaming gagadanon sa laog kan harong mo.’ Pagbalik kan mga espiya ki Josue, sinabi ninda saiya an gabos na nangyari.