ABA abaume baali mu bwafya. Balingile ukubutuka, pantu nga tababutwike balabepaya. Aba baume bena Israele abaile mu kulengula icalo kabili umwanakashi uwalebafwa ni Rahabu. Rahabu aleikala muli iyi ing’anda iyali mu mbali ya cibumba ca musumba wa Yeriko. Natulande pa calengele aba baume ukuba mu bwafya.

Abena Israele baali mupepi no kwabuka Umumana wa Yordani no kwingila mu Kanaani. Lelo ilyo bashila-abuka, Yoshua atumine inengu shibili. Abebele ati: ‘Kabiyeni, kalenguleni icalo no musumba wa Yeriko.’

Ilyo inengu shafikile mu Yeriko, shaile mu ng’anda ya kwa Rahabu. Lelo umuntu umo aile-eba imfumu ya Yeriko ati: ‘Kuli inengu shibili ishishile mu kumona icalo.’ Ilyo imfumu yaumfwile ifi, yatumine abaume ku ng’anda ya kwa Rahabu, kabili baile-eba Rahabu ati: ‘Fumya abaume abali mu ng’anda yobe!’ Lelo Rahabu alifishile abaume pa mutenge wa ng’anda. Atile: ‘Ee, kwaciba abaume abacisa kuno, nomba nshacishiba uko bacifuma. Lelo baciya ilyo impongolo bashilaisala ninshi tapalafita. Nga mwaendesha, mwalabasanga!’ E ico aba baume balile mu kufwaya inengu.

Ilyo fye baile, Rahabu aninine pa mutenge no kweba inengu ati: ‘Ninjishiba ukuti Yehova akamupeela cino calo. Twalyumfwa ifyo akamishe Bemba Wakashika ilyo mwalefuma mu Egupti ne fyo mwaipeye imfumu Sihone na Oge. Nimwafwa, e ico napapata ndayeni ukuti na imwe mukanjafwa. Mukapusushe batata na bamayo, na ba ndume yandi kumo na bankanshi nandi.’

Inengu shalilaile ukuti shikamwafwa, lelo Rahabu na o ali no kucitapo cimo. Inengu shamwebele ukuti: ‘Senda aka katambo akashika no kukakaka pa windo, no kulonganya balupwa lobe bonse mu ng’anda yobe. Nga twabwela kuno ku Yeriko, tukamona uyu mwando pe windo lyobe kabili tatwakepaye uuli onse uwa mu ng’anda yobe.’ Ilyo inengu shabwelele kuli Yoshua, shalimwebele fyonse ifyacitike.