Abahüdaguni 44

Haramudun aríaahatiña

GATURÓBULINTIÑU wügüriña ha. Mosu hanurahan, luéi háfarawagun hilagubei. Ísüraelina aríaahatiña fulasu ha, würi to íderagubaliñu Raabü tíribei. Tidan aban muna ligibuagu lubarieirun Herikó teredera. Ariha waméi ida liña lan lasuseredun sun le.

Lidoun haali hánhiñuraguni ísüraelina duna Hordán lun hebelurun lidoun fulasu le gíribei Kanán. Gama lumoun lubaragiñe hebelurun, aba lóunahan Hosué biama aríaahatiña. Lariñaga houn: ‘Heiba arihei múa luma uburugu Herikó.’

Dan le hebelurun aríaahatiña hagía uburugun Herikó, aba houdin túbiñe Raabü. Gama lumoun aba lariñagun somu gürigia lun lurúeite Herikó: ‘Ñǘbuintiña biama ísüraelina gúñaarü guñoun aríaahei fulasu.’ Dan le laganbuni urúei katei le, aba lóunahan wügüriña ariñaga tun Raabü: ‘Sagabaña wügüriña ha búbiñebaña!’ Gama lumoun aramuda taaña Raabü wügüriña hagía tábulugu tuban. Ligía tariñagunbei: ‘Nǘbuintiña fiú eyeriñu núbiñe, ani ibidiñeti nun halíana hamá. Aba houdin dan le aguñedeina lan, lubaragiñe ladourun lubenari uburugu. Anhaün éibaagua, hárügüdübaña!’ Aba héibaagun wügüriña hagía áluahaña.

Dan le houdin, aba tawarirun Raabü tábulugun muna. ‘Subuditi nun luagu líchugubei lan Heowá múa le hun,’ tiña houn aríaahatiña. ‘Aganbatiwa luagu mábeigüdalani barana Funati dan le háfuridunbei Ehiptugiñe, áfaragua humaniña giñe urúeigu Sihón luma Ogu. Ladüga nubuidun huma, füramase humá nun, lau fulesei, luagu buídubadün lan numa. Sefu huméi núguchi, núguchu hama níbirigu.’

Füramasetiña aríaahatiña luagu hadügübei lan ítara, gama lumoun mosu tadügün Raabü somu katei. ‘Ragübei gúrudu funati le, gürabei luagu tufunederan buban,’ haña aríaahatiña, ‘ábameti bóundaraguniña sun biduheñu búbiñe. Danme le wagiribudun sun wagía lun wanügüni Herikó ábame warihini gúrudu, máfarunbadiwa ni aban gürigia búbiñe.’ Dan le hagiribudun aríaahatiña lumoun Hosué, aba hariñaguni lun sun le asuseredubei.

Hosué 2:1-24; Ebüréu 11:31.