MALUNGA wano kali mu kapalia. Ayo ndo achine, yika kumashaha. Ayo kali ngendeshi A-Izalele, haliapwila pwo yoze unaakwase kali Rahape. Rahape te katwama ku zuwo lize lili helu lia chipanga cha mbonge ya Yeriku. Tunyingikenu mumu liaka malunga wano ali mu kapalia.

A-Izalele te halilulieka kulu hanga azauke Lwiji Yordau ni kunjila mu Kanana. Muze te chino kanda achichilinga, Yoshua yatuma ngendeshi aali. Iye yamba kuli ayo ngwenyi: ‘Yenu nukatale chize chifuchi chapwa ni mbonge ya Yeriku.’

Muze ngendeshi ahetele mu mbonge ya Yeriku, ayo yaya ku zuwo lia Rahape. Alioze umwe mutu yatoweza mwanangana wa Yeriku ngwenyi: ‘Muno mwanjila A-Izalele aali ha ufuku hanga atale chifuchi.’ Muze mwanangana achivwile, iye yatuma malunga kuli Rahape, hanga amwambe ngwo: ‘Tuhwisa haze malunga waze uli noo mu zuwo!’ Alioze Rahape yasweka ngendeshi jacho helu lia fulumba lia zuwo lienyi. Chocho iye yamba ngwenyi: ‘Ewa, amwe malunga kezanga ku zuwo liami, alioze te chiso kunyingika kwami kuze te ayo anakatuka. Ayo kakatukanga muze te hikwaputuka kutoka, ni chikolo cha mbonge te kanda achi chajila. Nyi nwazomboka, munuhasa kwawana!’ Chocho malunga jacho yaya ni kwafupa.

Muze ayo te haya, Rahape yanyina helu lia fulumba. Yamba kuli ngendeshi ngwenyi: ‘Yami ngunanyingika ngwami Yehova makanwaha chifuchi chino. Yetwe twevwa chize iye omishine meya a mu Kulunga-lwiji Muchila muze nwakatukile mu Engitu, ni chize iye ashahile mianangana a Sahone ni a Oge. Yami nanukwasa chinji, kashika ni yenwe akwetu ngwehenu kama chilakenyo ngwo, munukangukwasa. Hanga nukalamwine tata ni mama, nawa ni mandumbu jami a malunga ni a mapwo.’

Ngendeshi yalakenya kuchilinga, alioze ndo te Rahape alinge chimwe chuma. Ngendeshi yamulweza ngwo, ‘Kwata lwoji au muchila hanga umukase ha kapenda wa zuwo lie, nawa ukakungulula asoko je eswe mu zuwo lie. Muze yetwe eswe mutukafuna hanga tukumbe Yeriku, yetwe mutukamona lwoji yono ha kapenda wa zuwo lie, chocho tuchi kashaha niumwe wa ku zuwo lie.’ Muze ngendeshi afunyine kuli Yoshua yamulumbunwina yuma yeswe yize yapwileko.