AŨME aa me thĩnanĩ. No nginya mathi mĩtũkĩ, kana moawe. Nĩ athiani Aisilaeli, na mũndũ mũka ũũ ũnũmatetheesya mathi nĩ Laavi. Laavi ekalaa vaa nyũmbanĩ ĩno ĩkwatanĩte na ũkũta wa ndũa ya Yeliko. Ekai twone nĩkĩ aũme aa me thĩnanĩ.

Aisilaeli nĩmeyũmbanĩtye kũinga Ũsĩ wa Yolotani malike nthĩ ya Kanaani. Ĩndĩ mbee wa matanamba kwĩka ũu, Yosua nĩwatũmie athiani elĩ na ameĩaĩa: ‘Endai, mũsisye nthĩ, na ndũa ya Yeliko.’

Na athiani asu mavika Yeliko, mathi malika nyũmba kwa Laavi. Na mũndũ mũna atavya mũsumbi wa Yeliko ũũ: ‘Aisilaeli elĩ nĩmalikile kũũ ũtukũ ũũ mathiane nthĩ.’ Na mũsumbĩ eew’a ũu, atũma aũme kwa Laavi, namo mamwĩaĩa maimwĩa: ‘Umaalya, aũme ala me nyũmba kwaku.’ Ĩndĩ Laavi aĩ anavitha athiani asu kĩalanĩ kya nyũmba yake. Kwoou asya: ‘Andũ asu nĩmokie nyũmbanĩ yakwa, ĩndĩ ndinamanya kũla meeumĩte. Na kwatuka ala andũ maumaala, mbingĩlo ĩtanamba kũvingwa. Maatĩĩei mĩtũkĩ, nĩmũtonya kũmakwata!’ Na ĩndĩ aũme asu masemba mamatĩĩe.

Na mamina ũthi, Laavi ambata na mĩtũkĩ kĩalanĩ. Na atavya athiani asu ũũ: ‘Nĩnĩsĩ Yeova akamũnenga nthĩ ĩno. Nĩtw’ĩwĩte ũndũ Yeova wang’alĩthisye kĩw’ũ kya Ũkanga Mũtune yĩla mwaumĩte Misili, na ũndũ mwoaie mũsumbĩ Sioni na Oku. Nĩnĩmwĩw’ĩie tei, kwoou mbĩavĩei, nĩngũmwĩsũva, kana o nakwa mũkambĩw’ĩa tei. Mũtangĩĩe nau, na mwaitũ, na ana-a-asa na eĩtũ-a-asa makwa.’

Na athiani asu mamwĩavĩa kana makeeka ũu, ĩndĩ Laavi no mũvaka eke ũndũ mũna. Kwoou athiani asu mamwĩa: ‘Osa ĩkanda yĩĩ ya ũlii mũtune, woveleele ndĩlĩsyanĩ yaku, na ũyũmbany’a andũ onthe ma ũko waku nyũmbanĩ yaku. Na yĩla tũkasyoka kũkwata ndũa ya Yeliko, tũkoona ĩkanda yĩĩ ya ũlii mũtune ndĩlĩsyanĩ yaku naitũ tũikowaa mũndũ o na ũmwe nyũmbanĩ yaku.’ Yĩla athiani asu masyokie kũla kwĩ Yosua, nĩmamũtavisye maũndũ onthe ala mamakwatie.

Yosua 2:1-24; Aevelania 11:31.