EBʼ LI winq aʼin wankebʼ saʼ chʼaʼajkilal, tento naq teʼeleliq re naq inkʼaʼ teʼkamsiiq. Ebʼ li winq aʼin, ebʼ aj Israel. Li ixq li yook chi tenqʼank rehebʼ aʼan li xRahab. Li rochoch li xRahab wank chire xnubʼaal li tenamit Jerico. Qilaq chanru kikʼulmank aʼin.

Akʼ okebʼ re laj Israel saʼ li tenamit Canaan naq laj Josue kixtaqla wiibʼ li winq ut kixye rehebʼ: ‹Cheeril chaq li chʼochʼ ut li tenamit Jerico›.

Naq ebʼ li wiibʼ aj Israel keʼwulak saʼ li tenamit Jerico, keʼok saʼ rochoch li xRahab. Jun rehebʼ li poyanam kixye re li awabʼej re Jerico: ‹Chi qʼeq keʼok chaq wiibʼ laj Israel chi rilbʼal li tenamit›. Joʼkan naq li awabʼej kixtaqlahebʼ winq saʼ rochoch li xRahab. Ut keʼxye re li xRahab: ‹Isihebʼ chaq laj Israel saʼ laawochoch!› Li xRahab kixmuqebʼ li wiibʼ aj Israel saʼ xbʼeen li rochoch ut kixye: ‹Yal naq keʼkʼulunk wiibʼ chi winq saʼ wochoch, abʼan inkʼaʼ ninnaw aj bʼarebʼ. Xkohebʼ naq ak okebʼ re xtzʼapbʼal li rokebʼaal li tenamit. Wi texxik saʼ junpaat chirixebʼ, teetawebʼ chaq!› Joʼkan naq ebʼ li winq kohebʼ saʼ aanil.

Naq xkohebʼ li winq, li xRahab kixye rehebʼ laj Israel: ‹Laaʼin ninnaw naq li Jehobʼa tixkʼe eere li tenamit aʼin. Xqabʼi resil naq li Jehobʼa kixchaqihobʼresi li Kaqi Palaw naq kexʼelk chaq Egipto. Ut naq xeekamsi ebʼ li awabʼej re Sehon ut Og›. Li xRahab kixye ajwiʼ: ‹Laaʼin xexintenqʼa. Joʼkan naq cheebʼaanu usilal, cheekolaq linnaʼ linyuwaʼ, ebʼ li was ut ebʼ li wiitzʼin!›

Ebʼ laj Israel keʼxkʼulubʼa li kixye li xRahab, abʼan kiyeheʼk re: ‹Taabʼakʼ jun li kaqi kʼaam chiru laabʼentaan ut taachʼutubʼ laajunkabʼal saʼ laawochoch. Naq toochalq xsachbʼal li tenamit Jerico ut tqil li kʼaam aʼin, maaʼani tixkamsi laajunkabʼal›. Naq ebʼ li wiibʼ chi winq keʼwulak rikʼin laj Josue keʼxye re chixjunil li keʼxkʼul chaq saʼ li tenamit Jerico.