ပူ ၄၄
ရၤဃးပာ်ခူသူၣ် ပှၤကွၢ်ခူသူၣ်တၢ်တဖၣ် အဂ့ၢ်
ပှၤတဖၣ်အံၤ ဘၣ်ကီဘၣ်ခဲဝဲန့ၣ်လီၤ. အဝဲသ့ၣ်မ့တဟးထီၣ်ဝဲဖဲန့ၣ် ကဘၣ်တၢ်မၤသံအီၤလီၤ. အဝဲသ့ၣ်မ့ၢ် ပှၤအံၣ်စရ့လးဖိအပှၤကွၢ်ခူသူၣ်တၢ်တဖၣ်, ဒီးပိာ်မုၣ်လၢအမၤစၢၤအီၤန့ၢ် မ့ၢ်ရၤဃးန့ၣ်လီၤ. ရၤဃးအိၣ်လၢဟံၣ်လၢ တၢ်ဘှီဃာ်အီၤလၢ ယရံၤဃိအဝ့ၢ်ခိၣ်ဒူအလိၤန့ၣ်လီၤ. ပှၤတဖၣ်အံၤ ဘၣ်မနုၤအဃိ ဘၣ်ကီဘၣ်ခဲလဲၣ်အဂ့ၢ်န့ၣ် ပကကွၢ်သကိးတက့ၢ်.
ပှၤအံၣ်စရ့လးဖိတဖၣ်န့ၣ် ကနုာ်လီၤဆူကီၢ်ကနၤဧၣ်အဂီၢ် ဖဲအိၣ်ကတီၤအသးလၢ ကခီဂာ်ထံကျိယၣ်ဒ့ၣ်အကတီၢ်န့ၣ်လီၤ. တချုးနုာ်လီၤဝဲသ့ၣ်ဆူကီၢ်ပူၤဒံးဘၣ်န့ၣ် ယိၤၡူပျဲလီၤပှၤကွၢ်ခူသူၣ်တၢ်ခံဂၤန့ၣ်လီၤ. ယိၤၡူမၢလီၤအီၤဒီးစံး, ‘လဲၤကွၢ်ခူသူၣ် ထံကီၢ်ဒီးဝ့ၢ်ယရံၤဃိတက့ၢ်’ န့ၣ်လီၤ.
ဖဲပှၤကွၢ်ခူသူၣ်တၢ်တဖၣ် တုၤလၢဝ့ၢ်ယရံၤဃိဒီး လဲၤနုာ်ဝဲသ့ၣ်ဆူ ရၤဃးအဟံၣ်န့ၣ်လီၤ. ဘၣ်ဆၣ်သနာ်က့ ပှၤတဂၤဆှၢတၢ်ကစီၣ်ဆူ ယရံၤဃိအစီၤပၤ, စံးဝဲဒၣ် ‘တဟါညါအံၤ ပှၤအံၣ်စရ့လးဖိခံဂၤ ဟဲနုာ်လီၤဆူကီၢ်ပူၤ လၢကကွၢ်ခူသူၣ်ထံကီၢ်အဂီၢ်န့ၣ်လီၤ.’ ဖဲစီၤပၤနၢ်ဟူတၢ်ဝဲန့ၣ်အခါ မၢလီၤအပှၤတဖၣ်လဲၤဆူ ရၤဃးအဟံၣ်န့ၣ်လီၤ. ပှၤတဖၣ်စံးဝဲရၤဃးလၢ ‘ထုးထီၣ်ပှၤတဖၣ်လၢနဟံၣ်ပူၤ ဆူတၢ်အချၢတက့ၢ်’ န့ၣ်လီၤ. ဘၣ်ဆၣ်သနာ်က့ ရၤဃးတခီ ပာ်ခူသူၣ် ပှၤကွၢ်ခူသူၣ်တၢ်တဖၣ် လၢဟံၣ်ခိၣ်ဒုးအဖီခိၣ်န့ၣ်လီၤ. ဒီးစံးဝဲဒၣ်လၢ ‘ပိာ်ခွါတဖၣ်ဟဲဆူယဟံၣ်န့ၣ် မ့ၢ်မးဧိၢ်, ဘၣ်ဆၣ် အဝဲသ့ၣ်ဟဲဝဲလၢလဲၣ်န့ၣ် ယတသ့ၣ်ညါဘၣ်. ဟးထီၣ်ဝဲသ့ၣ်လၢ တၢ်ခံးလီၤသီ ဖဲဝ့ၢ်အပဲတြီ တချုးတၢ်ကးတံာ်အီၤန့ၣ်လီၤ. သုမ့ၢ်လူၤချ့ချ့သၢပျၢၤ ကချုးန့ၢ်အီၤလီၤ.’ ထဲန့ၣ်ဒီး ပှၤတဖၣ်အံၤ လူၤထွဲဝဲပှၤကွၢ်ခူသူၣ်တၢ်တဖၣ်အခံန့ၣ်လီၤ.
ပှၤတဖၣ်န့ၣ်ဟးထီၣ်ဝံၤအလီၤခံ ရၤဃးဟဲထီၣ်ဝဲပစူၢ်ပတ့ၤဆူဟံၣ်ခိၣ်ဒုးန့ၣ်ဒီး တဲဝဲပှၤကွၢ်ခူသူၣ်တၢ်တဖၣ် ဒ်အံၤလီၤ. ‘ယသ့ၣ်ညါလၢ ယဟိဝၤကဟ့ၣ်လီၤသု ထံကီၢ်အံၤန့ၣ်လီၤ. ဖဲသုအိၣ်ဟးထီၣ်လၢ ကီၣ်အဲၤကူပတူးဒီး ယဟိဝၤမၤလီၤသံးကွံာ် ပီၣ်လဲၣ်ဂီၤဒ်လဲၣ်အဂ့ၢ်, သုမၤသံ စီၤပၤစံဃိၣ်ဒီး စီၤပၤဧိာ်တဖၣ်ဒ်လဲၣ်အဂ့ၢ်န့ၣ် ပနၢ်ဟူတ့ၢ်ဝဲလီၤ. ဒ်ယမၤဘျုးတ့ၢ်လံသုအဃိဒီး ဝံသးစူၤ အၢၣ်လီၤအီလီၤယၤလၢ သုကမၤဘျုးဆၢက့ၤယၤတက့ၢ်. မၤပူၤမၤဖျဲး ယပါပၢ်, ယမိမိၢ် ဒီးယဒီပုၢ်ဝဲၢ်တဖၣ်အသးသမူတက့ၢ်.’
ပှၤကွၢ်ခူသူၣ်တၢ်တဖၣ် အၢၣ်လီၤအီလီၤဝဲသ့ၣ်လၢ ကမၤန့ၢ်ဝဲဒ်တဲဝဲအသိး, ဘၣ်ဆၣ် ရၤဃးစ့ၢ်ကီး ကဘၣ်မၤဝဲဒၣ်တၢ်တမံၤန့ၣ်လီၤ. အဝဲသ့ၣ်စံးအီၤ ‘ဟံးထီၣ်ပျံၤဖါဂီၤအံၤဒီး စၢဃာ်အီၤလၢနပဲတြီတက့ၢ်. ပာ်ဖှိၣ်နဘူးနတံၢ်တဖၣ်လၢ နဟံၣ်ပူၤတက့ၢ်. ပှၤကွၢ်ခူသူၣ်တၢ်ခံဂၤစံးဝဲဒၣ်, တုၤပဟဲက့ၤကဒါက့ၤဆူယရံၤဃိအခါ ပမ့ထံၣ်ပျံၤအံၤလၢနပဲတြီန့ၣ် ပတမၤသံပှၤလၢအအိၣ်လၢ နဟံၣ်ပူၤနီတဂၤဘၣ်.’ တုၤပှၤကွၢ်ခူသူၣ်တၢ်တဖၣ် ဟဲက့ၤတုၤဆူယိၤၡူအအိၣ်ဒီး စံးဘၣ်တဲဘၣ်က့ၤ တၢ်လၢအမၤတ့ၢ်အသးတဖၣ်န့ၣ် တုၤအလၢာ်အဆ့န့ၣ်လီၤ.