ລາຫາບເຊື່ອງຜູ້ສອດແນມ
ບົດ 44
ລາຫາບເຊື່ອງຜູ້ສອດແນມ
ຊາຍສອງຄົນນີ້ຕົກຢູ່ໃນອັນຕະລາຍ. ເຂົາຈຳຕ້ອງໄປໃຫ້ພົ້ນ ບໍ່ດັ່ງນັ້ນເຂົາຈະຖືກຂ້າ. ເຂົາເປັນຜູ້ສອດແນມຍິດສະລາເອນ ແລະຜູ້ຍິງທີ່ພວມຊ່ວຍເຂົາຢູ່ຄືລາຫາບ. ລາຫາບອາໄສຢູ່ທີ່ນີ້ໃນເຮືອນຊຶ່ງຕັ້ງຢູ່ເທິງກຳແພງເມືອງເຢລິໂກ. ໃຫ້ເຮົາຕິດຕາມເບິ່ງວ່າເປັນຫຍັງຊາຍສອງຄົນນີ້ຈຶ່ງຕົກຢູ່ໃນອັນຕະລາຍ.
ຊົນຍິດສະລາເອນກຽມພ້ອມທີ່ຈະຂ້າມແມ່ນ້ຳຢູລະເດນເຂົ້າໄປໃນແຜ່ນດິນການາອານ. ແຕ່ວ່າກ່ອນທີ່ເຂົາຈະຂ້າມໄປ ໂຢຊວຍສົ່ງຄົນສອດແນມສອງຄົນໄປ. ທ່ານບອກເຂົາວ່າ: ‘ຈົ່ງໄປກວດເບິ່ງແຜ່ນດິນແລະເມືອງເຢລິໂກ.’
ເມື່ອຄົນສອດແນມມາເຖິງເຢລິໂກ ເຂົາໄປທີ່ເຮືອນຂອງລາຫາບ. ແຕ່ມີບາງຄົນໄປທູນກະສັດເຢລິໂກວ່າ: ‘ມີຊາຍຍິດສະລາເອນສອງຄົນເຂົ້າມາທີ່ນີ້ເມື່ອຄືນນີ້ເພື່ອຈະສອດແນມເບິ່ງແຜ່ນດິນ.’ ເມື່ອໄດ້ຍິນເຊັ່ນນີ້ ກະສັດໄດ້ສົ່ງຄົນໄປຫາລາຫາບແລະສັ່ງນາງວ່າ: ‘ຈົ່ງສົ່ງຜູ້ຊາຍທີ່ມາຫາເຈົ້າໃນເຮືອນຂອງເຈົ້ານັ້ນມາໃຫ້ເຮົາ!’ ແຕ່ລາຫາບໄດ້ເຊື່ອງຄົນສອດແນມໄວ້ເທິງຫຼັງຄາ. ດັ່ງນັ້ນນາງບອກວ່າ: ‘ມີຊາຍບາງຄົນມາທີ່ເຮືອນຂ້ອຍ ແຕ່ຂ້ອຍບໍ່ຮູ້ວ່າເຂົາມາແຕ່ໃສ. ເຂົາອອກໄປຕອນຄ່ຳກ່ອນປະຕູເມືອງປິດ. ຖ້າທ່ານຮີບຕາມໄປ ທ່ານຄົງຈະຈັບເຂົາໄດ້!’ ແລະດັ່ງນັ້ນຄົນພວກນັ້ນກໍ່ໄລ່ຕາມເຂົາໄປ.
ຫຼັງຈາກເຂົາອອກໄປແລ້ວ ລາຫາບກໍ່ຟ້າວຂຶ້ນໄປເທິງຫຼັງຄາ. ນາງເວົ້າກັບຄົນສອດແນມວ່າ: ‘ຂ້ອຍຮູ້ວ່າພະເຢໂຫວາຈະປະທານແຜ່ນດິນນີ້ແກ່ພວກທ່ານ. ພວກເຮົາໄດ້ຍິນເລື່ອງທີ່ພະອົງກະທຳໃຫ້ທະເລແດງແຫ້ງ ເມື່ອພວກທ່ານອອກຈາກອີຢີບ ແລະເລື່ອງການທີ່ທ່ານໄດ້ຂ້າກະສັດຊີໂໜແລະກະສັດໂອກ. ຂ້ອຍໄດ້ສະແດງຄວາມກະລຸນາຕໍ່ເຈົ້າ ດັ່ງນັ້ນຈຶ່ງຂໍເຈົ້າໄດ້ໂປດສັນຍາຕໍ່ຂ້ອຍວ່າເຈົ້າຈະສະແດງຄວາມກະລຸນາຕໍ່ຂ້ອຍເຊັ່ນກັນ. ຂໍຊ່ວຍຊີວິດພໍ່ແມ່ແລະອ້າຍນ້ອງຊາຍຍິງຂອງຂ້ອຍດ້ວຍເຖີດ.’
ຄົນສອດແນມສັນຍາວ່າເຂົາຈະຊ່ວຍ ແຕ່ລາຫາບຈຳຕ້ອງເຮັດບາງຢ່າງ. ຄົນສອດແນມກ່າວວ່າ: ‘ຈົ່ງເອົາເຊືອກສີແດງເສັ້ນນີ້ຜູກໄວ້ທີ່ປ່ອງຢ້ຽມຂອງເຈົ້າ ແລະຈົ່ງລວບລວມຍາດພີ່ນ້ອງທັງໝົດເຂົ້າມາຢູ່ໃນເຮືອນດ້ວຍກັນກັບເຈົ້າ. ແລະເມື່ອພວກເຮົາກັບມາຍຶດເອົາເມືອງເຢລິໂກ ເຮົາຈະເຫັນເຊືອກເສັ້ນນີ້ຢູ່ທີ່ປ່ອງຢ້ຽມຂອງເຈົ້າແລະຈະບໍ່ຂ້າຄົນນຶ່ງຄົນໃດໃນເຮືອນຂອງເຈົ້າ.’ ເມື່ອຄົນສອດແນມກັບໄປຫາໂຢຊວຍ ເຂົາຈຶ່ງເລົ່າໃຫ້ທ່ານຟັງທຸກສິ່ງທີ່ເກີດຂຶ້ນນັ້ນ.