Chihande 44

Lahave Mwasweka Vandoji

MALUNGA ava vali muukalu. Kuvanga vaseunuke nge chiku, navavajiha. Hivandoji javaIsalele, kaha pwevo anakuvakafwa ikiye Lahave. Eyi zuvo yili hakembwe yanganda yaYeliko, yikiko zuvo yaLahave. Tuwanenu chuma chinavengisa malungava muukalu.

VaIsalele vanalizange vazauke Kalwiji Yotau nakwingila muKanane. Oloze shimbu kanda valinge ngocho, Yoshuwa mwatuma vandoji vavali. Hikuvalweza ngwenyi: ‘Yenu musondwese lifuchi kana nanganda yaYeliko.’

Vandoji hakwingila muYeliko, hikuya kuzuvo yaLahave. Mutu umwe hikulweza mwangana waYeliko ngwenyi: ‘VaIsalele vavali vanengila muno naufuku nakusondwesa lifuchi.’ Mwangana hakwivwako, himwatuma malunga kuli Lahave, nakumwamba ngwavo: ‘Valovole malunga vanengila muzuvo yove!’ Oloze Lahave nasweke vandoji mwilu lyazuvo. Jino ngwenyi: ‘Eyo, muzuvo yami mwengilanga malunga vamwe, oloze oku vanafumu kwijivako chiku. Valovokanga omu kwalinganga milima, shimbu kanda vasoke chikolo chalimbo. Nge namuzangula, munahase kuvakwata!’ Kaha vaze malunga vavakavangijile lumbushi.

Omu vanalovoka, Lahave hikunyina washi helu. Hikulweza vandoji ngwenyi: ‘Ngunejiva ngwami Yehova mwamihana lifuchi lino. Twevwa muze omishile Kalungalwiji Uchila haze mwalovokele muEjipitu, nomu mwajihile vamyangana vaShihone naOnge. Ngunalingi mwalikoji, kahenu nawa lishingenu kukalinga mwalikoji kulyami. Kapulululenu vatata namama, navandumbwami vosena.’

Vandoji hikulishinga kulinga ngocho, oloze Lahave atela kulingaho chuma chimwe. Vandoji ngwavo ‘Mbata lungoji luchila ulukase kunjanena yove, kaha ulikungulwile vausoko jove vosena muzuvo yove. Etu hakwiza kuYeliko, natukamona lungoji munjanena yove kaha katweshi kukajihaho umwe wamuzuvo yoveko.’ Vandoji hikuhiluka kuli Yoshuwa, nakumulweza vyosena vyasolokanga kuze.

Yoshuwa 2:1-24; WavaHepeleu 11:31.