AVA vamala va li mu vukalu. Va na pande ku tina kati ngoco va va tsiha. Va pua vandondzi va ku Isaleli kaha ou mpuevo a li na ku va kuasa ikeye Lahave. Lahave ua kala mu ndzivo eyi ya litokeka ku civumbe ca Yeliko. Tu ci mone vika via kovelesa ava vamala mu vukalu.

VaIsaleli va li ku hiehi na ku zavuka Ndonga ya Yondau linga va kovele mu cifuti ca Kanana. Vunoni ntsimbu kanda va ci zavuke, Yehosua na tumu vandondzi vavali. Na va tumu ngueni: ‘Hamenu mu ka tale mua cili cifuti ca Yeliko na mbonge yaco.’

Omo vandondzi vaka hetele ku Yeliko, va ka tulile ku ndzivo ya Lahave. Vunoni kua kele umo ua lunguile muangana ua Yeliko ngueni: ‘Ku vutsiki vua lelo muno mua kovela vamo vamala vavali va ku Isaleli va neza mu ku nenga cifuti’. Kaha omo muangana na vi ivu na tumu vamo vamala kuli Lahave, kaha va mu leka nguavo: ‘Tuhula vamala va li mu ndzivo yove va tuhuke tu va mone!’ Vunoni Lahave ua va suekele ha tsimba ya ndzivo yeni. Kaha ua va leka ngueni: ‘Kuli vamo vamala va nezile mu ndzivo yange, vunoni ka nji tantekeya kuli va na fumu. Va na tuhuka laza tele ku ci putuka ku lava, ntsimbu kanda va ci soka Mapito a mbonge. Nga mu va ka va vuasi-vuasi, mu ka va kuata!’ Kaha vaze vamala va ile na ku va kavangeya.

Mu va ile, Lahave ua londa vuasi-vuasi ha tsimba. Ua ka handeka na vandondzi ngueni: ‘Nja tantekeya nguange Yehova aka mi hana cino cifuti. Tu nevu vati Yehova uomisile Cisali ca ku Tila na vati mua tuhukile mu Ingito kaha nomo mu mua tsihile muangana ua Sihone na ua ku Onge. Nji na muesa ngozi ya kama kuli yenu, sukulukambu nji kulahesenu ngueni, mua ku nji vuilako ngozi. Kati mua ku nongese tata na nana kaha na vandumbuange na vamuanetu.’

Vandondzi va mu kulahesa nguavo citanga cahi, vunoni Lahave na pande ku linga vimo. Kaha vandondzi va mu sika nguavo: ‘Tambula ou mukole ua ku tila kaha uka u kuta ku njanena ya ndzivo yove kaha kungulula va vusoko vuove vose mu ndzivo yove. Kaha omo tu ka hiluka ku Yeliko nga tu ka mona ou mukole ua ku tila ku njanena yove, ka tu ka tsiha muntu mu ndzivo yove’. Kaha omo vandondzi va na hiluka kuli Yehosua, va na ka mu leka viose via ka va solokelele.