KUA lekua tuai e tau tagata taane nei. Ne latatonu ni a laua ke fehola neke kelipopo a laua. Ko laua ko e tau tagata toko a Isaraela, ti ko e fifine ne lagomatai a laua ko Raava. Ne nofo a Raava hinei he fale he kaupa he maaga ko Ieriko. O mai la ke kumikumi ko e ha kua lekua e tau tagata taane nei.

Kua mautali e tau Isaraela ke o atu ke he taha faahi he Vailele ko Ioritana ke he motu ko Kanana. Ka e to o atu a lautolu, ne fakafano atu e Iosua tokoua e tagata toko. Tala age a ia ki a laua: ‘Kia o a mua mo e kitekite ke he motu mo e maaga ko Ieriko.’

Magaaho ne hohoko e tau tagata toko ki Ieriko, ne o a laua ke he fale ha Raava. Ka e fai tagata ne tala age ke he patuiki ha Ieriko: ‘Kua tokoua e Isaraela ne o mai he po nei ke toko ke he motu.’ Magaaho ne logona he patuiki e mena nei, ne fakafano atu e ia e tau tagata taane ki a Raava, ti poaki a lautolu ki a ia: ‘Kia ta mai e koe ki fafo e tau tagata kua ha ha he fale haau!’ Ka kua fufū e Raava e tau tagata toko i luga he tua fale haana. Ti pehē age a ia: ‘Ne o mai e tau tagata ke he fale haaku, ka e nakai iloa e au ko e o mai i fe a laua. Kua teitei ke pouli ti o a laua, ato pa e gutuhala he maaga. Ka tutuli fakaave atu a mutolu to liga moua e mutolu a laua!’ Ti tutuli atu e tau tagata ki a laua.

Momole atu a lautolu ti hake fakaave a Raava ki luga he tua fale. ‘Kua iloa e au to foaki atu e Iehova e motu nai ki a mutolu,’ he tala age e ia ke he tau tagata toko. ‘Logona e mautolu ne fakapakupaku e ia e Tahi Kula he magaaho ne toka e mutolu a Aikupito, mo e puhala ne tamate e mutolu e tau patuiki ko Sikono mo Oko. Kua fakaalofa au ki a mua, ti fakamolemole omonuo mai ki a au to fakaalofa a mua ki a au. Fakamoui e matua taane mo e matua fifine haaku, mo e tau matakainaga haaku.’

Ne mavehe he tau tagata toko to taute pihia e laua, ka e fai mena foki a Raava ka taute. ‘Uta e toua filo kula nei ti pipi ai ke he fakamaama haau,’ he ui he tau tagata toko, ‘ti fakapotopoto mai e tau magafaoa oti haau ke he fale haau. Ti ko e magaaho ka liliu mai a mautolu ke fofō a Ieriko, to kitia e mautolu e toua nei he fakamaama haau ti nakai tamate ha tagata i loto he fale haau.’ Magaaho ne liliu e tau tagata toko ki a Iosua, ne tala age e laua e tau mena oti ne tupu.