OVALUME ava vekahi movitateka. Vesukila okutila, opo vahankhie. Ovo ovalavi vo Isilayeli, iya omukai ukahi nokuvekuatesako o Raabe. Raabe ukala mondyuo ei ikahi kombanda yotyimato tyepundaumbo lio Jerikoo. Pahe tutalei omokonda yatyi ovalume ava vakalela movitateka.

Ovaisilayeli ankho velipongiya pala okuyauka Ondongi Jordau, okuenda noko tyilongo tyo Kanaa. Anthi, etyi nkhele veheneyauke Josue watuma ovalavi vevali. Evetolela okuti: ‘Endei mukatale otyilongo nepundaumbo lio Jerikoo.’

Ovalavi vanyingila mo Jerikoo, avai mondyuo ya Raabe. Mahi pena omunthu umue wevemona iya akatolela ohamba yo Jerikoo okuti: ‘Ovaisilayeli vevali veya muno kounthiki wohono okulava otyilongo.’ Etyi ohamba etyiiva, watuma ovalume ku Raabe, iya ovalume ovo avatolela Raabe okuti: ‘Eta kuno ovalume vekahi mondyuo yove.’ Anthi, Raabe ankho waholekale ovalavi peulu lio ondyuo. Raabe apopi okuti: ‘Tyotyili mueile ovalume vamue mondyuo yange, mahi ame ankho hityii opi vatunda. Vapitale kokangulohi, etyi epito liepundaumbo nkhele liheneikwe. Inkha muhateka, mupondola okuvevasa.’ Ngotyo ovalume ovo avakahatekela monyima yavo.

Etyi ovalume ovo vatundapo, Raabe wakahatekela peulu lio ondyuo. Iya atolela ovalavi okuti: ‘Ame ndyityii okuti Yehova memuavela otyilongo etyi. Tuetyiiva okuti Huku wakukutisa Elunga Enkhuhu etyi muatunda ko Egitu. Netyi muaipaa onohamba Sion na Oge. Ame nakala nokankhenda noonue, moluotyo, noonue kalei nokankhenda naame. Yovolei tate na me yange, no nondenge mbange, no nomphange mbange.’

Ovalavi vemulaa okuti matutyilingi, anthi, Raabe ankho una yokulinga otyipuka tyimue. Ovalavi vemupopila okuti: ‘Kuata epanda eli enkhuhu olikutu pondyanena yove. Ongiya ombunga yove aiho okala navo mondyuo yove. Putyina tuamakondoka opo tunyingile mo Jerikoo, matumono epanda eli enkhuhu pondyanena yove iya atuahaipaamo nawike mondyuo yove.’ Etyi ovalavi vakondoka ku Josue, avemutolela atyiho tyapita navo.