MENLI ɛhye wɔ esiane nu. Ɔwɔ kɛ bɛnriandi, tɛ ye zɔhane a bɛbahu bɛ. Bɛle Yizilayɛ busiama, na raalɛ ne mɔɔ ɔlɛboa bɛ la a le Releehabe. Releehabe de sua bie mɔɔ bɛzi ye wɔ suakpole Gyɛleko bane ne azo la anu. Maa yɛnlea deɛ mɔɔ ɔti menli ɛhye wɔ esiane nu la.

Ɛnee Yizilayɛma ɛziezie bɛ nwo kɛ bɛkapɛ Azule Dwɔdan ne bɛahɔ Keena azɛlɛ ne azo. Noko kolaa na bɛahɔ la, Dwɔhyua zoanle busiama nwiɔ ne. Ɔzele bɛ kɛ: ‘Bɛhɔli busia na bɛnleɛnlea kɛ azɛlɛ ne nee suakpole Gyɛleko si de la.’

Mekɛ mɔɔ busiama ne dwule Gyɛleko la, bɛhɔle Releehabe sua nu. Na awie hɔhanle hilele Gyɛleko belemgbunli ne kɛ: ‘Yizilayɛma nwiɔ bie ɛra ɛke nɔsolɛ ye ala kɛ bɛbanleɛnlea maanle ye anu.’ Belemgbunli ne dele ala la, ɔzoanle menli wɔ Releehabe ɛkɛ ne na bɛzele ye kɛ: ‘Fa menli ne mɔɔ wɔ wɔ sua ne anu la, bɛla ɛke!’ Noko mekɛ zɔhane ɛnee Releehabe ɛva menli ne ɛhɔvea ye sua ne ati zo anwuma. Ɔti ɔbuale bɛ kɛ: ‘Menli bie rale me sua nu ɛke ɛdeɛ, noko menze ɛleka mɔɔ bɛvi a. Bɛziale na sɛnzɛne ne adɔ, kolaa na bɛado suakpole ne anlenkɛ kpole ne anu. Saa bɛkpo bɛ a, bɛbahɔdo bɛ adenle nu!’ Yemɔti menli ne bɔle ɔ bo kpole bɛ.

Bɛhɔle ala la, Releehabe nriandile hɔle sua ne ati zo. Ɔzele busiama ne kɛ: ‘Meze kɛ Gyihova bava azɛlɛ ɛhye amaa bɛ. Yɛde kɛzi ɔmanle Nyevile Kɔkɔlɛ ne sesanle bɔkɔɔ manle bɛpɛle ye wɔ mekɛ mɔɔ bɛvi Yigyibiti bɛlɛba la, nee kɛzi bɛhunle Ɔɔgo nee Saehɔn arelemgbunli ne mɔ la. Meyɛ bɛ boɛ, ɔti mesɛlɛ bɛ, bɛbɔ me ɛwɔkɛ kɛ bɛkɛlo me. Bɛlie egya nee ɔmɔ, me mediema mrenya nee mraalɛ ngoane.’

Busiama ne mɔ bɔle ɛwɔkɛ kɛ bɛkɛyɛ, noko ɔwɔ kɛ Releehabe yɛ nwolɛ debie. Busiama ne zele ye kɛ: ‘Fa nyɛma kɔkɔlɛ ɛhye kenda wɔ nvɛzɛlɛ ne anu, na boɔboa ɛ nwo amra amuala wɔ wɔ aako ye anu. Na saa yɛsia yɛba kɛ yɛbava Gyɛleko a, yɛanwu nyɛma ne wɔ nvɛzɛlɛ ne anu na yɛangu wɔ aako ye anu sonla biala.’ Mekɛ mɔɔ busiama ne ziale hɔle Dwɔhyua anwo lɔ la, bɛhanle mɔɔ zile la amuala bɛhilele ye.