NUYU̱ yä ñꞌo̱ho̱ pe̱ꞌtsi nꞌa rä xuñha. Pe̱ꞌtsi te dä bo̱ni dä ma pa hindä tho. Nuyu̱ mi yä israelita, ha nuni rä ꞌme̱hñä fatsꞌi, rä thuhu Raab. Rä nguu rä Raab mi to̱ge mäñä de nuꞌu̱ yä jädo mi kotꞌi rä hnini Jeriko. Ma gä handihu̱ hanja bi thogi nuya yä tꞌo̱tꞌe.

Yä israelita ya di ñhoki pa dä rꞌani rä däthe Jordan ꞌne pa dä yu̱tꞌi ha rä hai Kanään. Pe änte dä yu̱tꞌi, rä Josue mꞌe̱tꞌo bi me̱hni yoho yä ñꞌo̱ho̱ pa dä handi rä hnini Jeriko ꞌne bi ꞌñembi: “Guä handihu̱ tengu näꞌä rä hai ꞌne näꞌä rä hnini Jeriko”.

Mi yu̱tꞌi nuyu̱ yä ñꞌo̱ho̱ ha Jeriko, bi ma pa ha rä nguu Raab. Pe bi mꞌu̱ toꞌo bi xipi näꞌä ndä mi mända ha Jeriko: “Mä nxui bä ehe yoho yä israelita pa dä hyandi mä haihu̱”. Mi yꞌo̱de nuya yä noya, näꞌä rä ndä bi me̱hni rꞌa yä ñꞌo̱ho̱ ha rä nguu Raab ꞌne bi ꞌñembäbi: “¡Ju̱ki nuꞌu̱ yä ñꞌo̱ho̱ xä yꞌu̱tꞌi ha ri nguu!”. Pe Raab xki ꞌñägi nuꞌu̱ yä ñꞌo̱ho̱ mäñä de rä nguu. ꞌNe bi ꞌñenä: “Rꞌa yä ñꞌo̱ho̱ bä ehe ha mä nguu, pe hindi pädi habu̱ mi yä mengu. Nuꞌu̱, bi ma ngu bi da rä xui, änte xä njotꞌi rä goxthi rä hnini. ¡Mu̱ gi nextꞌihu̱, mä gi tsu̱dihu̱!”. ꞌNe nuꞌu̱ yä ñꞌo̱ho̱ bi nextꞌi pa dä honi.

Mi ma nuꞌu̱ yä ñꞌo̱ho̱, rä Raab nguntꞌä bi bo̱tsꞌe mäñä ha rä nguu, ꞌne bi ꞌñembi nuꞌu̱ yä ñꞌo̱ho̱ xki ꞌñägi: “Nuga di pädi ge Jeoba ma dä rꞌaꞌähu̱ nunä rä hai. Dä o̱dehe ge bä heke rä mar Rojo nuꞌmu̱ guä po̱nihu̱ de Ejipto, ꞌnehe ge nuꞌähu̱ guä hohu̱ yoho yä ndä: rä Seon ꞌne rä Og. Nuga dä pe̱fi näꞌä xä ñho pa kongeꞌähu̱, hänge di adi ko rä mäte gi jurahu̱ ge ma gi pe̱fihu̱ näꞌä xä ñho pa kongeki. Ñänihu̱ mä dada, mä nänä, nuꞌu̱ mä ku ꞌne nuꞌu̱ mä nju”.

Nuꞌu̱ yoho yä ñꞌo̱ho̱ bi jura ge ma dä ja njabu̱, pe ꞌnehe bi xipi rä Raab näꞌä mi pe̱ꞌtsi te dä me̱fi. Bi ꞌñembäbi: “Ju̱ nunä rä the̱ngä nthähi ꞌne thätꞌi ha ri bentanä, ꞌne muntsꞌi gatꞌho nuꞌu̱ ri pariente nuua ha ri nguu. ꞌNe nuꞌmu̱ xkä pengihe pa gä hänihe nunä rä hnini Jeriko, ꞌne gä handihe nunä rä nthähi ha ri bentanä, hinto ma gä hohe de ha ri nguu”. Mi mengi nuꞌu̱ yoho yä ñꞌo̱ho̱ ko rä Josue, bi xipi gatꞌho näꞌä xki thogi.