LAMADVODZA lowabonako asenkingeni, kufanele kutsi abaleke, ngoba uma angenti njalo atakufa. Atinhloli tema-Israyeli, bese kutsi lona lomsikati lowasitako nguRahabi. Rahabi uhlala lapha kulendlu loyibonako, isedolobheni laseJerikho. Ase sibone kutsi kwenteka kanjani kutsi lamadvodza abesenkingeni.

Ema-Israyeli abesakulungele kuwela uMfula iJordane angene eveni laseKhenani. Kodvwa ngembi kwekutsi ewele, Joshuwa watfumela tinhloli letimbili. Watsi kuto: ‘Hambani niyawuhlola live nelidolobha laseJerikho.’

Tatsi letinhloli natifika eJerikho, tahlala endlini yaRahabi. Kodvwa kukhona umuntfu lowaticeba enkhosini yaseJerikho, watsi: ‘Kukhona ema-Israyeli lamabili lafike lana ebusuku atewuhlola live.’ Inkhosi yatsi nayiva ngaloku yatfumela titfunywa tayo kuRahabi. Tefika kuye tamyala tatsi: ‘Khipha emadvodza langene endlini yakho!’ Rahabi abewatsetse lamadvodza wawafihla eluphahleni lwendlu yakhe. Ngako watsi: ‘Yebo kona emadvodza afikile lapha endlini yami, kodvwa angiwati kutsi abephumaphi. Kutsite nase kuhwalala, sekutawuvalwa emasango, aphuma ahamba. Phutfumani niwagijimise, ningahle niwabambe.’ Ngako letitfunywa taphuma tawagijimisa.

Setihambile letitfunywa, Rahabi wenyukela eluphahleni, watsi kuletinhloli: ‘Ngiyati kutsi Jehova utanipha lelive. Seva kutsi walomisa kanjani Lwandle loluBovu ngalesikhatsi niphuma eGibhithe, nekutsi nentani kuSihoni na-Ogi, emakhosi lamabili. Ngako njengobe nami nginiphetse kahle, fungani lapha kimi kutsi nani niyakungiphatsa kahle. Ningambulali babe, namake, nabomnaketfu kanye nabodzadzewetfu.’

Letinhloli tametsembisa Rahabi kutsi betiyawukwenta loko labekucelile, kodvwa kukhona letacela kutsi akwente. Tatsi: ‘Ubobopha lentsambo lebovu efasiteleni losikhiphe ngalo, ucocele ndzawonye wonkhe umndeni wakho lapha endlini yakho. Nasesilingenele live lenu siyobona ngalentsambo lebovu lesefasiteleni lakho, singababulali bantfu labatawube basendlini yakho.’ Tatsi letinhloli natifika kuJoshuwa, tamtjela ngako konkhe lokwakutivelele.