JA WINIKE it ayiʼoje jun wokol: tʼilani oj spak-e ajnel bʼa mi oj miljuke. Nake nakʼul kʼelwanume bʼa Israel, sok jaxa ixuk maʼ wa xkoltajiyujileʼi sbʼiʼil Rahab. Ja yeʼn tey ja snaj bʼa xchaʼanil kʼe sbardaʼil wa sjoybʼan ja chonabʼ Jericó. La kiltik jastal ekʼ ja it.

Ja israʼelenyo ojxtani skʼuts-e ja yok jaʼ Jordani bʼa oj ochuke ja bʼa Canaán. Pe bʼajtanto yuj oj ochuke, Josué sjeka chabʼ tsʼelsatinum. Yala yabʼye: «Kax ilawik jastal ay ja luʼumi sok ja chonabʼ Jericó».

Yajni ja tsʼelsatinumeʼi ochye ja bʼa chonabʼi, ti wajye bʼa snaj Rahab. Pe ay maʼ yala yabʼ ja mandaranum bʼa Jericó ja it: «Ja akʼwale jakye chabʼ winik israʼelenyo jak stsʼelsatuke ja luʼumi». Yajni ja mandaranum yabʼ ja it, sjeka jujuntik winike ja bʼa snaj ja Rahab bʼa waj yal-e yabʼ ja it: «¡Aʼeluk ja winike tey bʼa wa naji!». Pe ja Rahab snakʼunej ja chabʼ winiki bʼa yolom snaj. Yala: «Jujuntik winik jakye ja bʼa jnaji, pe mi xnaʼa bʼa jakeleʼa. Wajye yajni wanxa kʼikʼbʼeli, bʼajtanto yuj oj lutxuk ja spwertaʼil ja chonabʼi. Ja ta wiʼawex yi spatik, ojto alaj-ex». Jaxa winikeʼi wajye ajnel bʼa oj slaj-e.

Yajni wajye ja winikeʼi, Rahab weʼgo kʼe ja bʼa yolom snaji, sok yala yabʼ ja chabʼ tsʼelsatinumeʼi: «Ja keʼn jnaʼunej ja Jyoba oj yawilex ja luʼum it, sok kabʼunejtikon jastal ya takuk ja mar Rojo yajni ja weʼnlexi elyex ja bʼa Egipto, sok jastal amilawex ja mandaranum Sehón soka Og. Yujni ja keʼn jel lek jeʼunej ja jmodo amokex, ja yuj aʼawa paborex naʼawik jyajulal sok aʼawikan sakʼan ja jtati, ja jnani sok ja jmoj-alijel jumasaʼ».

Ja tsʼelsatinumeʼi yalawe jachʼni oj skʼulukeʼa, pe ja Rahab aytoni jas oj skʼuluka, jachʼ yalawe yabʼ: «Iʼaj ja chakal laso it, aʼa lokan bʼa wa bentana, chʼakan tsomo ja wa pamilya bʼa wa naj, sok ja yajni la kumxitikon bʼa oj jbʼajuktikon ja chonabʼi, oj kiltikon ja laso it sok mini maʼ oj jmiltikon ja bʼa wa naji». Yajni ja tsʼelsatinumeʼi kumxiye ja bʼay ja Josué, chʼak xchol-e yabʼ ja jasa ekʼi.