HISITOLIA 44
ʼE Fufū e Laape Te ʼu Malomu
KO TE ʼu tagata ʼaenī ʼe tau mo te tuʼutāmaki. ʼE tonu ke nā feholaki, naʼa matehi ia nāua. Ko te ʼu tagata ʼaia ʼe ko te ʼu malomu Iselaelite, pea ko te fafine ʼaē ʼe tokoni kia nāua ʼe ko Laape. ʼE nofo ia Laape ʼi te fale ʼaia ʼaē ʼe tuʼu ʼi te kaupā ʼo te kolo ʼo Seliko. Tou vakaʼi muʼa pe koʼe ʼe tau te ʼu tagata ʼaia mo te tuʼutāmaki.
Kua teuteu te kau Iselaelite ke nātou fakalaka ʼi te Vaitafe ko Solotane ke nātou hū ki te fenua ʼo Kanaane. Kae ʼi muʼa ʼo tanatou fai te meʼa ʼaia, neʼe fekauʼi e Sosue te ʼu malomu e toko lua. Neʼe ina ʼui age kia nāua: ‘Koulua ʼolo ʼo vakaʼi te fenua pea mo te kolo ko Seliko.’
ʼI te hū ʼa te ʼu malomu ki Seliko, neʼe nā ʼolo ki te ʼapi ʼo Laape. Kae neʼe ʼui e te tahi ki te hau ʼo Seliko: ‘Ko te ʼu Iselaelite e toko lua neʼe ʼōmai ʼi te po ʼaenī ʼo vakaʼi te fenua.’ ʼI tana logo ki te meʼa ʼaia, neʼe fekauʼi e te hau te ʼu tagata kia Laape, ke nā ʼui age ki ai: ‘Tuku mai te ʼu tagata ʼaē neʼe ʼōmai ki tou ʼapi!’ Kae neʼe fufū ia nāua e Laape ʼi te ʼato ʼo tona ʼapi. Pea neʼe ina ʼui age: ‘Neʼe ʼi ai te ʼu tagata neʼe ʼōmai ki toku ʼapi, kae ʼe mole ʼau ʼiloʼi peʼe nā ʼōmai maifea. Neʼe hoki nā mavae atu nei pe ʼi te tō ifo ʼo te pōʼuli, ʼi muʼa ʼo te pupunu ʼo te matapā ʼo te kolo. Koutou foimo tuli, pea ʼe feala anai hakotou puke ia nāua!’ Pea neʼe ʼolo ai te ʼu tagata ʼo kumi ia nāua.
ʼI tanatou ʼosi mavae, neʼe foimo ʼalu ai ia Laape ki te ʼu malomu ʼi te ʼato ʼo tona ʼapi, pea ina ʼui age kia nāua: ‘ ʼE ʼau ʼiloʼi ʼe foaki atu anai e Sehova kia koutou te fenua. Neʼe mātou logo ki tana fakamaha te Tai Kula ʼi takotou mavae ʼaē ʼi Esipito, pea mo takotou matehi te ʼu hau ko Sione pea mo Oki. Neʼe ʼau agalelei kia koulua, koia ʼe ʼau kole atu ke koulua fakapapau mai ʼe koutou toe agalelei anai kia ʼau. Hāofaki taku tāmai pea mo taku faʼe, pea mo toku ʼu tokolua pea mo toku ʼu tēhina.’
Neʼe fakapapau age e te ʼu malomu ʼe nā fai anai te faʼahi ʼaia, kae ʼe ʼi ai te meʼa ʼe tonu ke fai e Laape. Neʼe ʼui age e te ʼu malomu: ‘Toʼo te maea kula ʼaenī pea ke haʼi ʼi tou matapā fakamālama, pea ke fakatahiʼi tou famili fuli ki tou ʼapi. Pea ʼi tamatou ʼōmai ʼo ʼohofi ia Seliko, ʼe mātou sio anai ki te maea ʼi tou matapā fakamālama, pea ʼe mole mātou matehi anai he tahi ʼi tou ʼapi.’ ʼI te kaku atu ʼa te ʼu malomu kia Sosue, neʼe nā fakamatala age ki ai te ʼu meʼa fuli ʼaē neʼe hoko.