Tantara 44

Rahaba Nanitriky Mpitsikilo

SAHIRAN̈A lelahy aroe io. Hofoaty irô koa tsy milefa. Israelita irô io, nirahan̈a hizaha tany Kanana. Rahaba an̈aran̈a man̈angy io. Tran̈on’i Rahaba io amy sisin’ny lakoro vato fatatran’ny tanànan’i Jerikô. Alô atsika hizaha raha nampasahiran̈a lelahy aby io.

Israelita aby io fa pare hitsaka Ten̈aranon’i Jordana, beky avy amy tany Kanana. Fa alohan’izen̈y, Josoa nan̈iraka aroe lahy antsendriky hizaha tany io. Volan̈iny tamin-drô: ‘Mindao anarô mizaha tanànan’i Jerikô.’

Irô’roe lahy koa fa navy ta Jerikô, nandeha tamy tran̈on’i Rahaba. Kanefa, nisy olo nivolan̈a tamin’ampanjakan’i Jerikô: ‘Alin̈y in̈y, nisy Israelita aroe lahy navy hitsikilo tanitsika.’ Ampanjaka koa fa naharen̈y zen̈y, nan̈iraka olo handeha tamy Rahaba tan̈y. Volan̈in-drô tamy Rahaba: ‘Aboaha malaky lelahy aby aminao ato!’ Kanefa Rahaba nanitriky lelahy aby in̈y tamy tafon-tran̈onany tao. Ke volan̈iny tamin-drô: ‘Nisy lelahy aby zen̈y marin̈y navy taminakahy tatỳ, fa tsy haiko aia tany nandihanan-drô. Andra koa fa nahizikiziky, varavaran̈a tanàna tsendriky nifody, irô fa lôso. Izikoa anarô milomoay, mety mbala ho tatranarô alohaloha ao fo irô!’ Ke lelahy aby in̈y lôso ankitin̈y nan̈ian̈a irô.

Rahaba amy zay nilomoay malaky tamy tafon-tran̈o tan̈y. Volan̈iny tamin’Israelita aroe lahy in̈y: ‘Haiko fa Jehovah han̈amia anarô tany ty. Efa ren̈inay koa izy nampisaraka Ranomasin̈y Mena tamin’anarô niala Ejipta, aviô anarô nahavita namono Sihona ndreky Oga ampanjaka. Karaha nataoko nan̈ano tsara anarô, ataova raha atokisako fa anarô koa han̈ano tsara zaho. Vonjia koa babako ndreky mamako, ndreky ry anadahiko, ndreky rahavaviko jiaby.’

Irô’roe lahy nan̈eky, fa Rahaba fo tsy maintsy man̈ano raha koa. Volan̈in-drô taminany: ‘Mangalà tady mena, fiheza amy lafenaitaranao. Baka iô, avoria an̈aty tran̈o ty ry havanao jiaby, miaraka aminao. Lera zahay mimpody hanafiky Jerikô, tady io hahaizanay tran̈onao, ke zay olo an̈aty tran̈o ty tsy vonenay.’ Israelita aroe in̈y koa fa nimpody tamy Josoa tan̈y, nitantara raha jiaby nahazo irô tan̈y.

Josoa 2:1-24; Hebreo 11:31.