ACALUMEŴA asimene ni yakusawusya. Akusosekwa kutila, naga ngakutila nikuti ciŵawulaje. Jemanjaji ali asondi ŵa ku Yisalayeli. Jwamkongwe jwakwakamucisyajo ali Lahabu. Lahabu akusatama m’nyumbaji jajili mwipupa mwa msinda wa Yeliko. Kwende tulole ligongo lyakwe acalumeŵa asimene ni yakusawusyayi.

Ayisalayeli akosece kuti ajomboce Lusulo lwa Yolodani nikwinjila m’cilambo ca Kanani. Nambo mkanajomboce, Yoswa akwatuma asondi ŵaŵili. Akwasalila kuti: ‘Mjawule mkacilole cilamboco ni msinda wa Yeliko.’

Asondi ŵala, pakwinjila mu msinda wa Yeliko, akwawula ku nyumba ja Lahabu. Nambo mundu jwine akumsalila mwenye jwa ku Yeliko kuti: ‘Ayisalayeli ŵaŵili ayice akuno ciloci kukusonda cilamboci.’ Mwenyejo papikene yeleyi akwatuma ŵandu kwa Lahabu, ni akumlamula kuti: ‘Mkoposye acalume ŵamli nawo m’nyumba jenu!’ Nambo Lahabu ŵasisile asondiwo pamsakasa wa nyumba jakwe. Sambano jwalakwe akwanga kuti: ‘Yisyene nditu acalume ŵane ŵayice kunyumba jangu kuno, nambo ngangumanyilila kuti ŵatyocelaga kwapi. Atyosile pakwatandaga kuswa, litanga lya pacipata mkanawugale. Naga akuwutuka, komboleka kwasima!’ Ni sambano acalume ŵala akunyakuka ni kutanda kwawutucila asondiwo.

Paŵatyosile acalume ŵala, Lahabu akukwela mwacitema pamsakasa pala. Nikwasalila asondi ŵala kuti: ‘Ngumanyilila kuti Yehofa cacimpa cilamboci. Twapikene yaŵatesile Yehofa pakumusya Nyasa Jecejewu pamwatyokaga ku Eguputo, soni yamwatite pakuwulaga Sihoni ni Ogi, ŵaŵaliji acayimwene.’ Une nalosisye jemanja canasa, sambano asimicisye une, kuti cacindendela canasa. Cacakulupusya Atati ŵangu ni mama, soni acalumbu ŵangu ni acapwanga, yimpepe ni acakuluŵangu.’

Asondi ŵala ŵamsimicisye kuti cacitenda yeleyo, nambo Lahabu akusosekwa kutenda cindu cine. Asondi ŵala akumsalila kuti: ‘Mjigale lukonji lwecejewulu ni mlutaŵilile paliwindo lya nyumba jenu, soni msongangane ni ŵacinasi ŵenu wosope m’nyumba mwenu. Kuti pacituyikagasoni ku Yeliko, ni kuluwona lukonjilu pa liwindo lyenu ngasituwulaga jwalijose jucaciŵa m’nyumba mwenu.’ Asondi ŵala pawujile kwa Yoswa, akumsalila yosope yayitendekwe.