Historia 44

Rahab rucaachiʼ cani yeundaachiʼ

CA hombre riʼ la? cadíʼdicaʼ ti ra nagana. Nápacabe xidé guxooñecabe, para cadi guuti binni laacabe. Binni rundaachiʼ de Israel laacabe, ne gunaa ni cayacané laacabe nga Rahab. Rahab nabeza lu lindaa stiʼ Jericó. Guidúʼyanu ximodo guca ndiʼ.

Ca israelita ca nuuzi de tiidicabe guiiguʼ Jordán ne chúʼcabe guidxi Canaán. Peru ante chúʼcabe la? Josué ruseenda guiropaʼ ni rundaachiʼ que. Rábibe laacaʼ: Lachiguuya guidxi Jericó ca ne layú stiʼ.

Ora cani ziundaachiʼ ca riuucaʼ Jericó la? riécabe ralidxi Rahab. Peru riuu tuuxa rabi rey de Jericó: Nuchiʼ beeda chupa israelita para gundaachicaʼ layú riʼ. Ora binadiaga rey que ndiʼ la? ruseendabe caadxi hombre stibe ra nuu Rahab, para rábicabe laa: ¡Gulee ca hombre ni napuʼ ndaaniʼ liʼdxuʼ ca! Peru Rahab maʼ bicaachiʼ ca hombre ca ique lidxi. Laabe bicábibe laacaʼ: Caadxi hombre beeda ralidxeʼ, peru qué gannaʼ padé laacabe. Ante guixhinni jma ne guidaaguʼ puertaʼ stiʼ guidxi riʼ la? bireecabe zeecabe. ¡Pa guxooñetu zugaandatu laacabe! Ne ca hombre que ziguxooñecaʼ ziyúbicaʼ laacabe.

Zésicabe que la? riguiʼbaʼ guxooñeʼ Rahab ique yoo. Naa nannaʼ de que Jiobá zudii laatu layú riʼ, rábibe cani yeundaachiʼ que. Binadiágadu bicuiidxibe nisadóʼ Xiñáʼ que ora bireetu de Egipto ne de que laatu biititu rey stiʼ ca guidxi Sehón ne Og. Cumu naa gucaʼ nachaʼhuiʼ ne laatu la? lagabi la naa de que zácatu nachaʼhuiʼ ne naa. Lagulá bixhozeʼ ne jñaa, ca bizanaʼ ne ca bendaʼ.

Cani yeundaachiʼ ca rábicaʼ laabe de que zúnicabe ni, peru Rahab napa xidé guni xiixa. Gucuaa doo xiñáʼ riʼ ne bindiibi ni ra ventana stiluʼ, na cani yeundaachiʼ que rabi laabe, gulidxi guiráʼ binnilídxiluʼ raliʼdxuʼ. Ne ora guiradu guibiguétadu para guicaadu Jericó ne guuyadu doo riʼ la? qué zuutidu guirutiʼ nuu raliʼdxuʼ. Ora ribiguetaʼ cani yeundaachiʼ ca ra nuu Josué la? rábicabe laabe guiráʼ ni guca.

Josué 2:1-24; Hebreos 11:31.