CHOP buñguieeu ni rabilo reʼ noyibu ló galnagan. Non guixonyibu par diti tzó ni guigaity layibu. Layibu buñ israelitas ni raláach, né buñgonaʼ ni racné layibu ngú Rahab. Rahab rabésbu lainy toib yoʼ ni sob laidy muro nasoʼ de gudx Jericó. Guisuidyno ximod góc ndeʼ.

Israelitas mápa mer tudyibu guʼuc Jordán par tzóyibu lainy gudx Canaán. Per Josué nír raxel chop buñ ni tze tzaláach. Josué raiby layibu: Colguibí ximod nac gudx Jericó né ximod nac layoo ni napni.

Órni buñ ni sée saláach radxiin gudx Jericó rieyibu lidx Rahab. Per noʼ ni riée rigudx buñguieeu ni rony mandary gudx Jericó né ranibu: Gueʼel reʼ bieed chop israelitas biláach xcudxno. Órni bicadiagbu ndeʼ bixelbu tipnés buñguieeu par ñée nigudx Rahab: ¡Goleʼ buñguieeu ni noʼ laniolidxlo! Rahab ma bicachlan chop buñguieeu reʼ guic yoʼ lidx. Por ngú ranibu: Tipnés buñguieeu bieed lidxi, per diti naana chú buñ layibu. Órni goyogueʼel gonásyibu néz séeyibu órni yása guieg xpuert gudx. ¡Pal raxonyto labúu sigaʼlto layibu! Né layibu raxonyibu rinalyibu biinreʼ.

Órni ma séeyibu, Rahab raxony riaʼpy guic yoʼ né raibyibu a chop buñguieeu reʼ: Naʼ naana que Jehová saduidy gudx reʼ lóoto. Ma bicadiagdo ximod Jehová bixalbu galaʼ nisdaʼ Xináa órni lóoto bireʼto Egipto, né ximod bigaityto Sehón né Og ni buny mandary gudxcú. Naʼ góca buñtzay né lóoto, por ngú ranába lóoto colguiduidy xtiitzto, que scúca gonyto né naʼ. Colguilaa a guirá xfamily, bixiosa, xinaʼya, bisana né beela.

Chop buñguieeu ni raláach raduidybu xtiitzbu que gonybu scú, per noʼ ni non gony Rahab par labúu guilaa. Chop biinreʼ raibyibu a Rahab: Cuaʼ doʼ xináa reʼ né bilip láani roʼ bentan, né bitop guirá xfamilylo laniolidxlo. Né órni guibiguetdo par guinitlódo gudx Jericó guibído doʼ xináa reʼ né diti sagaitydo ni toib xfamilylo ni noʼ laniolidxlo. Órni rabiguet chop biinreʼ raibyibu Josué guirá ni góc.