MOO hyɛ! Israelbi ɔmɛ ngɛ Yordan Pa a poe! Se jije nyu ɔ ngɛ? Hɛngmɛfia bɔɔ ko pɛ nɛ́ be ɔ, pa a hyi fuu, ejakaa a ngɛ hiɔmi nɛmi be mi. Se amlɔ nɛ ɔ, nyu ɔ tsuo ta pa a mi! Nɛ Israelbi ɔmɛ ngɛ pa a poe ngɛ zugba gbigbli nɔ, kaa bɔnɛ a po Wo Tsutsu ɔ! Jije nyu ɔ tsuo ho? Ha nɛ waa hyɛ.

Loko Israelbi ɔmɛ maa po Yordan Pa a, Yehowa ha nɛ Yoshua de Israel ma a ke: ‘Osɔfo ɔmɛ maa tloo somi daka a kɛ nyɛɛ wa hɛ mi. Ke a ngɔ a nanehi kɛ ma Yordan Pa a mi pɛ, nyu ɔ ma kpa bemi.’

Lɔɔ he ɔ, osɔfo ɔmɛ tloo somi daka a kɛ nyɛɛ ma a hlami. Benɛ a ya su Yordan Pa a nya a, osɔfo ɔmɛ ngɔ a nanehi kɛ ma nyu ɔ mi. Pa a mi kuɔ nɛ e ngɛ bee kɛ he wami nitsɛ. Se benɛ a ma nyu ɔ mi pɛ kɛkɛ nɛ nyu ɔ kpa bemi! E ji nyakpɛ nɔ́! Yehowa ha nɛ nyu nɛ jee yiti je ɔ bua e he nya kɛ da si. Enɛ ɔ ha nɛ nyu ɔ ta pa a mi amlɔ nɔuu!

Osɔfo ɔmɛ nɛ́ tloo somi daka a nyɛɛ kɛ ya da si ngɛ pa a kpɛti tutuutu. Anɛ o na mɛ ngɛ foni ɔ mi lo? A da si ngɛ lejɛ ɔ kɛ ya si benɛ Israel ma a tsuo nyɛɛ zugba gbigbli ɔ nɔ kɛ po Yordan Pa a ta!

Benɛ nɔ tsuaa nɔ po pa a ta a, Yehowa ha nɛ Yoshua de nyumuhi 12 ke: ‘Nyɛɛ ya pa a mi, he nɛ osɔfo ɔmɛ tloo somi daka a kɛ daa si ngɛ ɔ. Nyɛ ya kukuɔ tɛ 12, nɛ nyɛ kɛ ya to he nɛ́ nyɛ maa hwɔ gbɔkuɛ nɛ ɔ. Nɛ hwɔɔ se ke nyɛ bimɛ bi nyɛ nɔ́ nɛ tɛ nɛ ɔmɛ tsɔɔ ɔ, nyɛ de mɛ ke, benɛ a ngɔ Yehowa somi daka a kɛ po Yordan Pa a, nyu ɔ kpa bemi. Tɛ nɛ ɔmɛ ma kai nyɛ nyakpɛ nɔ́ nɛ ɔ!’ Yoshua ngɔ tɛ nyɔngma kɛ enyɔ hu kɛ ma si ngɛ pa a mi he nɛ osɔfo ɔmɛ da si ngɛ ɔ.

Nyagbe ɔ, Yoshua de osɔfo ɔmɛ nɛ́ tloo somi daka a ke: ‘Nyɛɛ je kpo kɛ je Yordan Pa a mi.’ Nɛ benɛ a je kpo pɛ kɛkɛ nɛ pa a bɔni bemi ekohu.