¡ADKINTUNGE! ¡Tati pu Israel che petu rumey engün Jordan lewfü mu! Welu ¿chew am müley tati ko? Feychi mew, müna mawünkefuy pewü (pewün) mew, feymu rume apolekefuy lewfü. ¡Welu fewla niewelay ko! ¡Ka tati pu Israel che rumeley arkün mapu mu, chumngechi femi Kelü Lafken, ka femngechi femi! ¿Chew amutuy kom chi ko? Peafiyiñ.

Akulu ti antü pu Israel che ñi noal nome Jordan lewfü mew, fey tüfa Jewba femi ta Josue ñi feypiafiel ta pu che: ‘Tati pu saserdote müley ñi meñkual tati tukulpangepeyüm kakon, ka müley ñi wüneleal iñchiñ mew. Tukule tañi namun engün ti Jordan lewfü, tati ko katrütunieay.’

Fey mew tati pu saserdote witrampürami tati tukulpangepeyüm kakon, ka wüne yeniefi chi pu che mew. Akulu engün ti Jordan lewfü mew, tati pu saserdote llükanon koningün ko mu. Tati lewfü witruley ka llufüley (alü koni). ¡Welu pünofilu chi ko ñi namun engün, witruwelay chi ko! ¡Kiñe afmatun dungu tati! Doy wenutu lewfü mu, Jewba katrütuy ñi rupanoal ko. ¡Tati lewfü arküy!

Tati pu saserdote yenielu ti tukulpangepeyüm kakon rupayngün rangiñ arkün lewfü mu. ¿Eymi pepi pefimi ti adentun mu? ¡Petu ñi mülen üye mew, kom pu Israel che amuy rumealu Jordan lewfü angkün mapu!

Nome rumelu kom pu che, Jewba feypifi ta Josue: ‘­Dullinge (ngümintunge) mari epu ­newen ngen wentru ka ­werküfinge: “Amunge chew ñi mülen pu saserdote yenielu tati tukulpangepeyüm kakon lewfü mu. Üye mew nüafimün mari epu kura, ka elkünuafimün chew kom che ñi umapuam (umañpuam).” Fey mu küpalechi antü mu, ramtuelimünmew tamün pu yall: “¿Chem pifel tüfachi kura?”, müley ­tamün llowdunguafiel: “Nomelu Jordan lewfü mew Ngünechen ñi ­tukulpangepeyüm kakon, tati ko witruwelay”. ¡Tati kura tukulpalel­afi tüfachi afmatun dungu!’ Josue ka witranpürami tati mari epu kura chew mülemum tati pu ­saserdote lewfü mew.

Af mew Josue feypifi tati pu saserdote yenielu tati tukulpangepeyüm kakon: ‘Pürapamün Jordan lewfü mu.’ Femlu tüfa, ka wiño witrutuy tati lewfü.