MONA abena Israele baleabuka Umumana wa Yordani! Bushe amenshi yele kwi? Apo pali iyi inshita ya mwaka imfula yaleloka sana, umumana waliswile amenshi ilyo bashilatendeka ukwabuka. Lelo papitile fye inshita inono no mumana wakama! Kanshi abena Israele ba-abwike umumana pa mushili uwauma nga filya cali ilyo baleabuka Bemba Wakashika! Bushe amenshi yaile kwi? Natumone icacitike.

Ilyo inshita yafikile iya kuti abena Israele baabuke Umumana wa Yordani, Yehova aebele Yoshua ukweba abantu ati: ‘Bashimapepo bafwile ukusenda icipao ca cipangano no kuba pa ntanshi yesu. Nga banyanta mu menshi ya mu mumana wa Yordani, amenshi yalaleka ukupita.’

E ico bashimapepo basendele icipao ca cipangano no kuba pa ntanshi ya bantu. Ilyo bafikile pa Mumana wa Yordani, bashimapepo bailenyanta mu menshi. Amenshi yali ayengi kabili yalepita na maka sana. Lelo ilyo bashimapepo banyantile fye mu menshi, amenshi yaile-yaleleka ukupita! Ici cali cipesha mano! Yehova alengele amenshi ayalefuma ku muulu wa mumana ukwiminina nga menshi ya mu cishiba. Tapapitile ne nshita, amenshi yonse mu mumana yalikamine!

Bashimapepo abasendele icipano ca cipangano baile pa kati ka mumana ninshi amenshi nayakama. Bushe naubamona pa cikope? Ilyo baiminine palya, abena Israele ba-abwike Umumana wa Yordani ninshi amenshi nayakama!

Ilyo bonse bayabwike, Yehova aebele Yoshua ukweba abaume 12 abali na maka sana ati: ‘Kabiyeni mu mumana umo bashimapepo beminine ne cipao ca cipangano. Mutoole amabwe 12 no kuyatuulika apo bonse mwalaba ubushiku. Ku ntanshi ilyo abana benu bakamwipusha pali aya amabwe, mukabebe ati amenshi yalilekele ukupita ilyo icipao ca cipangano ica kwa Yehova cayabwike Yordani. Aya amabwe yakulamwibukisha ici icipesha amano!’ Yoshua atuulike amabwe 12 apo bashimapepo baiminine mu mumana.

Mu kulekelesha, Yoshua aebele bashimapepo abasendele icipao ca cipangano ati: ‘Fumeni mu mumana wa Yordani.’ Ilyo bafuminemo fye, amenshi yatendeke ukupita na kabili.