ZOH HMANH U! Israel mi hna cu Jordan Tiva kha an tan lengmang lio! Ti cu khoikadah an um? Khi lio caan ah ruah fakpi in a sur caah cu hlan minit tlawmpal ah cun tiva cu ti in a khat ko. Sihmanhsehlaw atu cu ti vialte an um ti lo! Cun Israel mi hna cu Rili Sen an rak tan lio bang khan leiro cung in an kal! Ti vialte cu khoikadah an kal dih? Zoh hmanh u sih.

Israel mi hna Jordan tiva an tan lai te ah, Jehovah nih Joshua cu mi hna kha hitin a chimh ter hna: ‘Tlangbawi hna nih biakamnak kuang kha an lak lai i hawi hlan in an kal lai. Jordan Tiva ti chung i an ke an thlak tik ah, ti cu a rung luang ti lai lo,’ tiah a ti.

Cucaah tlangbawi hna nih biakamnak kuang an lak i, mi hna hmai ah cun an kalpi. Jordan tiva an hung phanh tik ah tlangbawi hna nih ti chung ah cun an vung ṭum. A ti luan cu a hrat ngai i a thuh zong a thuk ngaingai. Sihmanhsehlaw an ke nih ti a tongh cangka, ti cu a rung luang ti lo! Khuaruahharnak hrimhrim a si ko! A cunglei i ti kha Jehovah nih aa dil ter. Cucaah a rauh hlan hrimhrim ah tiva chung ah cun ti cu a um ti lo!

Biakamnak kuang a putu tlangbawi hna cu tiva ro laifang ah khan an va kal. Hmanthlak chung ah hin annih cu nan hmu hna maw? Khika i an dir lio ah cun Israel mi vialte cu leiro cung ah Jordan Tiva cu an tan dih!

Pakhat hmanh tang lo in tiva kha an tan dih tik ah, Jehovah nih Joshua cu a ṭhawng mi pa hleihnih kha: ‘Biakamnak kuang a pu mi tlangbawi hna dirnak tiva chung ah vung kal u law, lung 12 in la u law, tuzan nan riahnak hmun ah hin pum hna u. Cun hmailei ah nan fale nih hi lung hna cu zei sullam dah a si tiah an in hal tik hna ah, Jehovah a biakamnak kuang cu Jordan tiva a rak tan lio ah ti cu luang lo in a rak cat tiah nan chimh hna lai. Hi lung hna nih hi khuaruahharnak kha an hngalh ter ṭhan zungzal hna lai!’ tiah chimh awk ah a fial. Joshua zong nih tlangbawi hna an dirnak hmun tiva laifang ah khan lung 12 a pumh ve.

A donghnak ah biakamnak kuang a putu tlangbawi hna kha Joshua nih: ‘Jordan tiva chung in chuak cang u,’ tiah a ti hna. An chuah cangka tiva cu hmasa bantuk in a luang ṭhan.