A FILƐ, Israɛldenw be Zurudɛn baji tigɛra! Nka, jii do be min? Saan wagati nin na, sanji be ben caaman. A ma mɛɛn yɛrɛ, baji tun fara kosɔbɛ. Nka sisan, a jii bɛɛ bolila! Israɛldenw be Zurudɛn tigɛra dugukolo janin kan i ko u y’a kɛ cogo min na Kɔgɔji Wulen na. Jii bɛɛ tagara min? An k’o filɛ.

Wagati sera tuma min na Israɛldenw fɛ ka Zurudɛn baji tigɛ, Jehova ko Zozuwe k’a fɔ jama ye ko: ‘Sarakalasebagaw ka kan ka layidu tagamasiɲɛ kɛsu ta ani ka bila aw ɲɛfɛ. N’u y’u seen don Zurudɛn baji la tuma min na, jii bena ja.’

Ayiwa, sarakalasebagaw ye layidu tagamasiɲɛ kɛsu ta ani ka bila jama ɲɛfɛ. U sera Zurudɛn na, u ma sigasiga, u sinna ka don jii kɔnɔ. Baji tun ka dun ani a tun be woyora fanga na. Nka, sarakalasebagaw seenw donna jii kɔnɔ dɔrɔn, jii y’a daminɛ ka ja. Nin tun ye kabako ye dɛ! Jii min tun be bɔ sanfɛla la ka boli ka na, Jehova y’o lalɔ yɔrɔ kelen na. O la, a ma mɛɛn baji bɛɛ jara!

Sarakalasebaga minw tun ye layidu tagamasiɲɛ kɛsu ta, olu sinna ka taga lɔ baa janin dingɛ cɛmancɛ la. I ɲɛɛ b’u la jaa kan wa? U lɔra o yɔrɔ la, Israɛldenw bɛɛ ye Zurudɛn baji tigɛ dugukolo janin kan!

Jama bɛɛ tɛmɛnin kɔ, Jehova ko Zozuwe k’a fɔ cɛɛ barikaman 12 ye ko: ‘Sarakalasebagaw lɔra yɔrɔ min na ni layidu tagamasiɲɛ kɛsu ye, a’ ye kabakuru deen 12 ta o yɔrɔ la ka taga ni u ye k’u ton aw bena sigi yɔrɔ min na sufɛ. O la, loon nataw la, n’aw deenw ye aw ɲininga kabakuru nunu kɔrɔ la, aw ka kan k’a fɔ u ye ko baji lɔra tuma min na Jehova ka layidu tagamasiɲɛ tun be Zurudɛn tigɛra. Kabakuru nunu bena to ka aw hakili jigi kabako nin na!’ Sarakalasebagaw lɔra yɔrɔ min na baji dingɛ kɔnɔ, Zozuwe ye kabakuru 12 lajɛn o yɔrɔ la fana.

A laban, sarakalasebaga minw tun ye layidu kɛsu ta, Zozuwe y’a fɔ olu ye ko: ‘Aw ye bɔ Zurudɛn kɔnɔ.’ U bɔra baji dingɛ kɔnɔ dɔrɔn, baji segira a nɔɔ na.