Esimwititi 45: Etaguruko lyomukuro gwaJorodana
TARA! Vaisraeli kuna kutaguruka mukuro gwaJorodana! Nye kupi oku gana kara mema? Nominute tupu dongandi komeho zeyi, mukuro kagu kara guna zura unene, morwa siruwo somumvho esi mvhura zonzi kuroka sili. Nye ngesi mema nagenye patupu! Ano Vaisraeli kuna kutaguruka pevhu lyekukutu ngomu va yi rugene pEfuta lyEgeha! Kupi oku gana zi mema nagenye? Tu tareni.
Apa sa sikire mo siruwo soVaisraeli va taguruke mukuro gwaJorodana, Jehova kwa ninkire Josuwa a tantere vantu asi: ‘Vapristeli va kona kudamuna sikesa segwanekero nokupita komeho zetu. Apa nava ka lyata nompadi dawo momema gomukuro gwaJorodana, mema makura taga ka hageka kukapupa.’
Vapristeli makura tava damuna sikesa segwanekero, nokusisimba komeho zovantu. Apa va ya sikire poJorodana, vapristeli makura tava lyata momema. Ago kuna kupupa nononkondo ntani etondo. Nye tupu nompadi dawo da gumine mema, mema makura taga hageke kupupa! Aso sitetu! Jehova kwa pongekere mema korukanduko. Konyima zosiruwo makura momukuro kapi hena muna kara mema!
Vapristeli ava va simbire sikesa somagwanekero makura tava zi dogoro pokatji komukuro ogu gwa kukutire. To va mono mefano? Apa va sikeme opo, Vaisraeli navenye tava taguruka mukuro gwaJorodana pevhu lyekukutu!
Apa navenye va tagurukire, Jehova makura ta ninki Josuwa a tantere vagara 12 wononkondo asi: ‘Ka zeni momukuro apa vana sikama vapristeli nosikesa segwanekero. Ka damuneni mamanya 12, makura mu ka ga sikameke apa nomu ka rara naina. Ano komeho, apa ngava mu pura vana veni asi yisinke aga tanta aga mamanya, mwa kona kuvatantera asi mema kwa hagekere kupupa apa sikesa saJehova segwanekero sa tagurukire Jorodana. Mamanya ngaga mu diworokesa sitetu esi!’ Josuwa kwa tulire hena mamanya 12 apa va sikeme vapristeli mokatji komukuro.
Mouhura Josuwa makura ta tantere vapristeli ava va simbire sikesa segwanekero asi: ‘Kandukeni mo moJorodana.’ Ano tupu va tundire mo, mukuro tagu tameke hena kupupa.
Josuwa 3:1-17; 4:1-18.
Mapuro
- Sitetu musinke ana rugana Jehova yipo Vaisraeli va vhure kutaguruka mukuro gwaJorodana?
- Sirugana musinke sepuro va hepa kurugana Vaisraeli yipo va taguruke mukuro gwaJorodana?
- Morwasinke ana kutantera Jehova Josuwa a pongaike mamanya 12 gomanene pokatji komukuro?
- Yinke yina horoka apa vapristeli vana kanduka mo moJorodana?
Mapuro gokugwederera ko
- Resa Josuwa 3:1-17.
Moomu sa yi fanekesa sihorokwa esi, yinke twa hepa kurugana yipo tu gwane evatero nomatungiko kwaJehova?
Mukaro musinke gwa kere gomukuro gwaJorodana apa Vaisraeli va tagurukilire moSirongo sEtumbwidiro, ntani ngapi eyi omu ya yererepekere edina lyaJehova?
- Resa Josuwa 4:1-18.
Sitambo musinke ga karerere po mamanya 12 aga va gusire moJorodana ntani nokugatura poGiligali?
