Navazauka Kalwiji Yotau
Chihande 45
Navazauka Kalwiji Yotau
TALA! vaIsalele vali nakuzauka Kalwiji Yotau! Nyi meya anayi kulihi? Kalwiji azalanga to kafwe minyutu yinakumu ngana, mwomwo yino hingonde yamingole. Oloze meya osena pimbi-pimbi! Kaha vaIsalele vanakuya musali hamavu aumu ngana muvalingile haKalungalwiji Uchila! Uno meya anayi kulihi? Tutalenu kanawa.
Omu lwola lwahetele mangana vaIsalele vazauke Kalwiji Yotau, Yehova ambile kuli Yoshuwa alweze vatu ngwenyi: ‘Vapilishitu vambate chikasha chalushiko nakutetekela kulutwe lwavatu. Omu navalyata hameya aKalwiji Yotau, kaha meya nawakemana ndundulu.’
Kaha vapilishitu hikumbata chikasha chalushiko, nakutetekela vatu. Hakuheta kuYotau, vapilishitu hikulyata hameya. Kalwiji ou wamuta, wakukunama. Oloze omu vinalingi vilyato vyavo lya hameya, nakushimbula chiku meya ndundulu! Hichuma chakukomwesa! Yehova nemika meya akalwiji. Kalinwaha vene meya mukalwiji chau!
Vapilishitu ava vanambate chikasha chalushiko hinavaya jino hakachi kakalwiji wakuma. Unavamono hamuvwimbimbi, ngwetu? Shimbu vanemana haze, vaIsalele vosena hikuzauka kutunda yaKalwiji Yotau!
Omu vanazauka vosena, Yehova hikwamba kuli Yoshuwa alweze malunga vangolo 12 ngwenyi: ‘Yenu hakalwiji haze vanemana vapilishitu vali nachikasha chalushiko. Mbatenu malolwa 12, nakulumbika heshoho namusavala ufuku. Ngocho kulutwe, omu vana venu navakahulisa mwaya mangana amalolwa kana, mukavalweze ngwenu meya emanyine omu chikasha chalushiko chaYehova chazaukile Yotau. Malolwa nawamyanukisanga chuma kanechi chakukomwesa!’ NaYoshuwa nawa alunjikile malolwa 12 haze hemanyine vapilishitu hakalwiji.
Jino Yoshuwa hikulweza vapilishitu vanambate chikasha ngwenyi: ‘Kandukenumo muYotau.’ Kaha omu vanakanduka, kalwiji meya cheka po-o.