Kuzambuka Kaloña Yodana
MPANJI 45
Kuzambuka Kaloña Yodana
TALAÑA! aIsarela anakuzambuka Kaloña Yodana! Dichi dinu menji anayi kudihi? Muloña nvula yanokaña nankashi munichi chilaaka, nawa kaloña kanadiñi kenzala katataka ichi. Ilaña menji ejima anomi! Nawa aIsarela anakuzambuka hamaseki awuma neyi chochazambukiliwu haKaluñalwiji Kachinana! Indi dinu menji ejima ayili kudihi? Twayenu tutali ntahi.
Chashikili mpinji yawaIsarela yakuzambuka Kaloña Yodana, Yehova walejeli Yoshuwa kuleja antu nindi: ‘Atupristu atela kusenda chimbañu chachitiyañenu nakuya kumbidi yetu. Chakadyatawu nyendu yawu mumenji amuKaloña Yodana, menji akaleka kuhita.’
Dichi atupristu hiyakusenda chimbañu chachitiyañenu nakutwaminina kumbidi yawantu. Chanashikiwu kuYodana, atupristu hiyakudyata mumenji. Menji anakuhita nañovu chikupu nawa hakunama. Chineli atupristu adyati nyendu yawu mumenji, menji atachika nikuleka kuhita! Hichihayamisha! Yehova wajikili kwafumaña menji amukaloña. Dichi, chakubula nikuhita mpinji mukaloña mwomini menji chawu!
Atupristu anasendi chimbañu chachitiyañenu hiyakuya chikupu hakachi kakaloña kanomi. Wunayimoni hamwevulu? Chanemaniwu henahana, aIsarela hiyakuzambuka Kaloña Yodana hamaseki awuma!
Chineli antu ejima azambuka dehi, Yehova hakumwila Yoshuwa aleji amayala 12 akola nindi: ‘Yenu hakachi kakaloña hanemaniwu atupristu nachimbañu chachitiyañenu. Nonenu malola 12 muyilumbiki kumukukamina. Dichi kumbidi neyi anyanenu ayihula nawu, idi awa malola anakulumbululadi, mwatela kuyileja nenu, menji alekeli kuhita chazambukili chimbañu chachitiyañenu chaYehova haYodana. Malola wenawa akayanukishaña ichi chihayamisha!’ Yoshuwa niyena washili malola 12 hemeniwu atupristu mukachi kakaloña.
Nkumininaku Yoshuwa hakuleja atupristu asendeli chimbañu chachitiyañenu nindi: ‘Fumenu muYodana.’ Cheliliwu tuhu atupristu afumi, mukaloña mwatachikili cheñi kuhita menji.
