¡CHÓTSENLALAI! ¡Je chjota israelita ya tjíofaʼatojin ya xongá Jordán! Tonga, jñáni kijna je nandá. Nga cha̱njtsíni nga kʼia, kʼoa nʼio tse nandá nya tsakai xongá xokji. ¡Tonga ngayeje nandá xi nya je tsín! ¡Kʼoa je chjota israelita tonangi kixí chon nga tjíofaʼato jokjoanná kisʼin nga jaʼato ya ndáchikon xi Ní ʼmi! Jñáni ki ngayeje nandá xi nya ya xongá. Kataʼyala.

Kʼianga je kichó nichxin nga kjoaʼatojinndá je chjota israelita ya xongá Jordán, kui jebi xi kitsole Jeobá je Josué nga kʼoakatatsole naxinandá: “Je naʼmi katabʼangʼa je kaxa jña nya je kjoa xi kisʼendajin kʼoa katafitítjonná. Kʼianga je kuinyajin ndsoko ya xongá Jordán, likuiti kjoaʼani je nandá”.

Xijekoan, je naʼmi kiskomitjen je kaxa jña nya je kjoa xi kisʼendajin kʼoa kitítjonle. Kʼianga je kichó ya xongá Jordán, je naʼmi kisʼenjin ya nandá. Nʼio tífaʼa nandá kʼoa nanga kijna. ¡Tonga kʼianga je tsakinyángindá ndsoko, je nandá kisʼechjoale kʼoa likuiti jaʼani! ¡Niná xokisʼin! Yaa tʼainni tsakʼéchjoale Jeobá je nandá. ¡Ñaki kixí koanchon!

Je naʼmi xi yʼangʼa je kaxa jña nya je kjoa xi kisʼendajin ya tsakinya ngabasenle xongá jña kixí koanchon. A tiʼyaní josísʼin matsen sén xi faʼaitʼa ibi. ¡Kʼianga ya nya je naʼmi ya ngabasenle xongá, ngatsʼi je chjota israelita tonangi kixí chon nga jaʼato ya xongá Jordán!

Kʼianga je jaʼatojin ngatsʼi, Jeobá kʼoakitsole Josué nga tejao chjota xi taja i̱ katatsole: “Tangion ya xongá jña tjío je naʼmi xi yʼangʼa je kaxa jña nya je kjoa xi kisʼendajin. Kʼoa tejao lajao tʼexkó kʼoa ya tikatío jñani kuiyo sʼai jnjio. Ánni nga je nichxin xi nroasíniján, kʼianga skónangi je xtino jméni xi tsoyanile lajao jebi, kʼoakʼuinlao nga kʼianga jaʼatojinndá i̱ Jordán je kaxa jña nya je kjoa xi kisʼendajin, je nandá likuiti jaʼani. ¡Je lajao jebi kui sikjaʼaitsjenjinno jmeni xi kasʼín Niná!” Kʼoati tejao lajao kisikatío Josué ya jñani tsakinya je naʼmi ya xongá.

Xijekoan, je Josué i̱ kitsole je naʼmi xi yʼangʼa je kaxa jña nya je kjoa xi kisʼendajin: “Titjojinño xongá”. Kʼianga je kitjojinni, ijngokʼa jaʼani je nandá.