Zistwar 45

Zot Travers Larivier Jourdain

GETE! Bann Izraelit pe travers Larivier Jourdain! Me kot delo larivier-la? Pandan sa lepok lane la lapli tom boukou, larivier ti bien ranpli zis de-trwa minit avan. Me asterla tou delo inn disparet! Ek bann Izraelit pe travers lor enn later sek parey kouma zot ti fer dan Lamer Rouge! Kot tou sa delo-la inn ale? Anou gete.

Kan finn ariv ler pou ki bann Izraelit travers Larivier Jourdain, get seki Jéhovah inn fer Josué dir lepep: ‘Bann pret bizin pran lars lalians ek mars devan nou. Kan zot pou met zot lipie dan Larivier Jourdain, delo pou aret desann.’

Alor, bann pret pran lars lalians ek sarye li devan lepep. Kan zot ariv kot Jourdain, bann pret rant direk dan delo. Delo-la bien fon ek kouran-la for. Me kouma zot lipie tous delo, delo-la aret desann! Se enn mirak! Jéhovah finn blok larivier-la pli lao. Alor, larivier pa finn tarde pou sek!

Bann pret ki pe sarye lars lalians kontign ale ziska ki zot ariv omilie sa larivier sek la. Eski to trouv zot dan zimaz? Pandan ki zot pe deboute, tou bann Izraelit travers Larivier Jourdain lor enn later sek!

Kan zot tou fini traverse, Jéhovah fer Josué dir 12 misie bien for: ‘Al dan larivier kot bann pret pe deboute avek lars lalians. Ramas 12 ros, ek met zot an ta dan landrwa kot zot pou pas lanwit. Lerla, dan lavenir, kan zot bann zanfan pou demann zot ki sa bann ros-la reprezante, zot bizin dir ki delo ti aret desann kan lars lalians Jéhovah ti travers Jourdain. Sa bann ros-la pou fer zot rapel sa mirak-la!’ Josué osi met 12 ros an ta dan landrwa kot bann pret ti deboute.

Alafin Josué dir bann pret ki ti pe sarye lars lalians: ‘Sorti dan Jourdain.’ Ek kouma zot fer sa, delo rekoumans desann dan larivier.

Josué 3:1-17; 4:1-18.