Jordan Awala Ba Lui Bangwan
Sturka 45
Jordan Awala Ba Lui Bangwan
KAIKI KAIS Israel uplika nani Jordan awalka lui bangwi ba! Sakuna, laya ba ani ra wan? Kan baha manka pyua bilara li ailal auhwi kan, bara awalka ba bisiura li bangki pali kan. Sakuna nanara li apu sa! Bara Israel uplika nani ba kabu Pauni ra luan ba baku tasba lawanku luisa! Laya ba ani ra wan? Kaisa kaikaia.
Israel uplika nani ba Jordan awalka luaia pyua balan taim, Jehova Jasua ra win taun uplika nani ra naku wibia: ‘Prîst nani ba lâ aisi daukan arkka brih taura wapaia sa. Bara witin nani Jordan awalka ra ai mina kangbia taim, li nani ba takasbia.’
Baku bara prîst nani ba lâ aisi daukan arkka ba buki brih upla nani taura wapan. Jordan ra wan taim, prîst nani ba liura dimi wan. Awalka ba tihu bara li karna aubi kan. Sakuna witin nani ai mina ba laya ra kangban taim, laya ba mahka alki takaskan! Sain kum kan! Awalka klaura, Jehova mita li aubra ba prakan. Bara awalka ba lawan!
Prîst nani, lâ aisi daukan arkka twilki ba, lui awala lila pasra takaski bangwan. Man lilkika ra kaikisma ki? Witin nani baha ra bui kan pyua ra, Israel uplika nani sut ba awalka lawan bakku lui wan!
Upla nani sut luan bara, Jehova mita Jasua ra win waitna karna 12 nani ra naku wibia: ‘Man nani prîst nani, lâ aisi daukan arkka ba brih bui ba ra was. Walpa 12 wahbi bribal, bara yawan tihmia lubia ba pliska ra swis, baku lika kaina tanira luhpiam nani, naha na dia walpaya makabi walbia taim, man nani wiaia sma lâ aisi daukan arkka ba Jordan awalka bakku brih luan pyua ra, li plapi kan ba alki takaskan. Walpa nani na kaikbia taim, sain daukan ba kupia kraukaisa!’ Baha purkara Jasua sin walpa 12 wahbi brin bara prîst nani bui kan ba kat asla dauki swin.
Las kat Jasua mita, prîst nani lâ aisi daukan arkka twilki kan ba ra win: ‘Jordan ba wina uli bangws.’ Baku daukan bara awala ba kli li auban.
