KOTO, na̱ ñuu Israel kósokavana yu̱ta Jordán. Soo ¿ndachun kǒokará ndíka̱a̱? Ta tiempo saá ndeéní xi̱kóon sa̱vi̱, tá kúma̱níka ya̱ʼana iin nda̱a̱ nda̱a̱ ndíka̱a̱ nu̱úra. Soo vitin ni̱yi̱chi̱vará kǒokará ndíka̱a̱. Na̱ ñuu Israel kósokavana ñuʼú yi̱chí táki̱ʼva ni̱ko̱sokavana mar Rojo. ¿Ndachun kǒokará ndíka̱a̱? Yóʼo sakuaʼayó xa̱ʼa ña̱yóʼo.

Tá ki̱xa̱a̱ ki̱vi̱ ña̱ ko̱sokava na̱ ñuu Israel yu̱ta Jordán, ña̱yóʼo kúú ña̱ ni̱ka̱ʼa̱n Jehová xíʼin ta̱ Josué ña̱ ka̱ʼa̱nra xíʼinna: ʼNa̱ su̱tu̱ kúú na̱ kunúu nu̱úyó ku̱ʼu̱nna ta kuisona tú caja ña̱ trato. Tá ná xa̱a̱na ki̱ʼvina ini yu̱ta Jordán saá yi̱chi̱varáʼ.

Ña̱kán na̱ su̱tu̱ kúú na̱ ndíso tú caja ña̱ trato ta kánuuna nu̱ú na̱ ñuu ku̱a̱ʼa̱nna. Tá ni̱xa̱a̱na yu̱ta Jordán kúnukavírá ta ndeékaví ku̱a̱ʼa̱nrá. Soo tá ni̱ki̱ʼvi na̱ su̱tu̱ inirá, iin kama kuití ni̱yi̱chi̱rá. Iin milagro kúú ña̱yóʼo. Jehová nda̱sira nu̱ú yu̱ta yóʼo, ta chí ni̱nu káa ki̱ndo̱orá. Yu̱ta yóʼo ni̱yi̱chi̱vará.

Na̱ su̱tu̱ na̱ ndíso tú caja yóʼo xi̱kunditana ma̱ʼñú yu̱ta, soo kǒokará ndíka̱a̱. Koto nu̱ú na̱ʼná yóʼo va̱xina. Na̱ su̱tu̱ ndítana ma̱ʼñú yu̱ta, tasaá ni̱ya̱ʼa ndiʼi na̱ ñuu Israel nu̱ú xi̱ndika̱a̱ yu̱ta Jordán.

Tá xa̱ni̱ya̱ʼa ndiʼina, Jehová ni̱ka̱ʼa̱nra xíʼin ta̱ Josué ña̱ ka̱ʼa̱nra xíʼin 12 ta̱a na̱ ndakú va̱ʼa: ʼKuaʼánndó ini yu̱ta nu̱ú ndíta na̱ su̱tu̱ xíʼin tú caja ña̱ trato. Ta kiʼinndó 12 yu̱u̱ ta sakáandóña nu̱ú ku̱su̱ndó ñu̱ú. Ña̱kán va̱ʼa chí nu̱únínu tá ná nda̱ka̱tu̱ʼun se̱ʼendó miíndó ndáaña kúni̱ kachi yu̱u̱ yóʼo, ta ka̱ʼa̱nndó xíʼinna, yóʼo kúú nu̱ú ni̱ya̱ʼana xíʼin caja ña̱ trato tá ni̱yi̱chi̱ yu̱ta. Yu̱u̱ yóʼo sandákaʼánñana xa̱ʼa milagro yóʼoʼ. Saátu ta̱ Josué sa̱káara 12 yu̱u̱ nu̱ú xi̱ndita na̱ su̱tu̱ ini yu̱ta yóʼo.

Tá ni̱ya̱ʼa ndiʼina saá ni̱ka̱ʼa̱n ta̱ Josué xíʼin na̱ su̱tu̱: ʼKeendó ini yu̱taʼ. Soo tá ke̱ena inirá nda̱kiʼin tukurá ku̱a̱ʼa̱nrá.