Okwambuka Omugyera Yorudani
Ekitebyo 45
Okwambuka Omugyera Yorudani
REEBA! Abaisraeli nibambuka Omugyera Yorudani! Kwonka shi amaizi gari nkahi? Ahabw’okugira ngu enjura neegwa nyingi omu bunaku bw’omwaka obwo, omugyera gwaba gwijwire omu dakiika nkye enyimaho. Kwonka hati amaizi goona gaagyenda! Abaisraeli bariyo nibambuka aha itaka ryomire nk’oku baakozire barikwambuka Enyanja Erikutukura! Kwonka shi amaizi goona gaazahi? Ka tureebe.
Obwire ku bwahikire obw’Abaisraeli kwambuka Omugyera Yorudani, eki nikyo Yehova yaahaire Yoshua kugambira abantu: ‘Abanyamurwa batware eshanduuko y’endagaano kandi beebembere. Ku baraaribate bati omu maizi g’Omugyera Yorudaani, obwo ahonaaho amaizi nigaija kurekyera aho kwiruka.’
Batyo abanyamurwa bakwata eshanduuko y’endagaano, bagiheeka beebembera abantu. Ku bahika aha Yorudani, abanyamurwa baribata omu maizi. Amaizi gaagwo nigairuka n’amaani kandi nimaraingwa. Kwonka ahonaaho ebigyere byabo ku byaribatsire biti omu maizi, amaizi gaarekyera aho kugyenda! Eki n’eky’okutangaaza! Eruguru Yehova akaba acungiire amaizi. N’ahabw’ekyo, omu kaanya kakye, tihakiriho maizi omu mugyera!
Abanyamurwa abaheekire eshanduuko y’endagaano beemerera rwagati y’omugyera. Noobareeba aho omu kishushani? Bakyemereire aho, Abaisraeli boona bambuka Omugyera Yorudani aha itaka ryomire!
Abantu boona ku bamara kwambuka, Yehova agambira Yoshua okugambira abashaija b’amaa- ni 12 ati: ‘Muze omu mugyera ahi abanyamurwa beemereire n’eshanduuko y’endagaano. Mutorotooremu amabaare 12, kandi mugate ahi mwena muraaraare eri izooba. Reero omu biro by’omu maisho, abaana baanyu ku baribabuuza eki aga mabaare garikumanyisa, mushemereire kubagambira ngu amaizi gakabaganisibwamu kabiri gaarekyera aho kwiruka obu eshanduuko y’endagaano yaayambuka Yorudaani. Amabaare nigaija kubaijutsya eky’okutangaaza eki!’ Kandi Yoshua nawe abyara agandi mabaare 12 ahi abanyamurwa baabaire beemereire ahagati y’omugyera.
Aha muheru Yoshua agambira abanyamurwa abaheekire eshanduuko y’endagaano ati: ‘Mwinamukye murugye omuri Yorudani.’ Kandi ku barugamu bati, amaizi g’omugyera gagaruka gagyenda.
