Jordán mayuta chimpanku
45 yachachiy
Jordán mayuta chimpanku
¡QHAWARIY! ¡Israelitakunaqa Jordán mayuta chimpachkanku! Jina kaptinqa, ¿maytaq yakuri? Chay para tiempopiqa may chhikata paramuq, mayutaq juntʼa kaq. ¡Kunantaq mayuqa chʼakikapun! ¡Israelitakunataq chʼaki jallpʼapi chimpachkanku, puka quchapijina! ¿Maymantaq yaku ripurqari? Qhawarina.
Israelitas chimpanapaq wakichisqa kachkaptinku, Jehová Josueniqta llaqtanman nirqa: ‘Sacerdotes kaqkuna, trato ruwasqay arcata uqharispa, ñawpaqiykichikta puririchunku. Paykuna Jordán mayup yakusninta saruykuptinkukama, patamanta jamuq yakuqa kikinpi sayakapunqa’, nispa.
Sacerdotesqa arcata uqharispa tukuy runap ñawpaqinta apanku. Jordanman chayaspataq yakuman yaykunku. Mayuqa chʼaqwarispa richkarqa, uqhutaq karqa. ¡Chaywanpis sacerdotespa chakisninku yakuman yaykusqankutawan mayuqa chʼakikapun! ¡Kayqa juk milagro! Pataniqpi Jehová mayup yakunta sayachin. ¡Chayrayku mayuqa chʼakipacha kachkan!
Arcata qʼipiq sacerdotesqa chʼaki mayup chawpinpi sayaykunku. ¿Dibujitupi rikunkichu? ¡Chaypi sacerdotes sayanankukama, tukuy israelitas chʼaki mayunta chimpanku!
Tukuyña chimpaptinku Jehová Josueniqta 12 qharita kamachirqa: ‘Chawpi mayukama rispa, chaymanta sapa jukniykichik juk rumita likrariykukuspa apamuychik, maypichus kunan puñunkichik chaymantaq churaykuychik. Jinamanta, wawasniykichik imatachus kay rumis niyta munasqanta tapuptinku, qamkuna ninkichik, Diospa trato ruwasqan arcata Jordán mayuta chimpachichkaptiyku, yakuqa chʼakikapurqa. ¡Kay 12 rumisqa chay yuyarinapaq kachkan!’, nispa. Josué maypichus sacerdotes mayupi sayarqanku chaypi, 12 jatun rumista sayachillarqataq.
Chanta Josué sacerdotesman nirqa: ‘Jordán mayumanta lluqsimullaychikña’, nispa. Lluqsimuptinkutaq mayuqa juktawan juntʼaykun.
