¡CHAWILAMPEʼ! ¡Ri täq israelitas tijan keqʼax pa ri nimalaj jaʼ Jordán! Tekʼuriʼ, ¿jachiʼ, o ni, kʼo wi ri jaʼ? Rumal che pa ri täq junabʼ riʼ kʼo jabʼ, ri nimalaj jaʼ sibʼalaj nojinäq pa kebʼ oxibʼ minutos chiʼ majaʼ keqʼaxik. ¡Tekʼuriʼ kimik kʼo ta chi jaʼ! ¡Ri täq israelitas tijan keqʼax puwiʼ chaqiʼj ulew junam che xkebʼan pa ri mar Rojo! ¿Jachiʼ, o ni, xbʼe wi ri jaʼ? Chqilampeʼ.

Chiʼ xopan ri qʼij che ri täq israelitas keqʼax pa ri nimalaj jaʼ Jordán, are waʼ ri xubʼan ri Jehová, tekʼuriʼ Josué xubʼij chike ri tinamit: ‹Rajawaxik che ri ajkojol tabʼal toqʼobʼ are kkeqaj ri koxon rech upacto ri Ajawaxel kenabʼej che qawäch. Chiʼ keʼok chupam ri jaʼ rech ri Jordán, kbʼin ta chi ri jaʼ›.

Tekʼuriʼ ri ajkojol tabʼal toqʼobʼ xkeyak ri koxon rech ri pacto tekʼuriʼ xenabʼej che kiwäch ri winaq. Chiʼ xeʼopan pa ri Jordán ri täq achijabʼ riʼ xeʼok pa ri jaʼ. Ri nimalaj jaʼ kbʼin chanim xuqujeʼ nim upam. ¡Chiʼ xkeya ri kaqan chupam, ri jaʼ xbʼin ta chik! ¡Wariʼ are Jehová xubʼano! Xkanaj kan ri jaʼ ajsik, rumal che Jehová xutzʼapij ubʼe ri jaʼ ¡Xchaqij ri nimalaj jaʼ!

Ri täq achijabʼ che keqan ri koxon rech ri pacto xeqʼax pa nikʼaj che ri nimalaj jaʼ pa jun bʼe chaqiʼj. Chawilampeʼ pa ri wachbʼäl ¡Chiʼ e kʼo chilaʼ, konojel ri täq israelitas xeqʼax pa ri chaqiʼj bʼe jachiʼ, o ni, kʼo wi ri nimalaj jaʼ nabʼe kanoq.

Chiʼ konojel xkeqʼaxej ri nimalaj jaʼ, Jehová xubʼij che Josué kutzukuj 12 achijabʼ nim kichoqʼabʼ: ‹Jix pa ri nimalaj jaʼ jachiʼ, o ni, e kʼo wi ri achijabʼ keqan ri koxon rech ri pacto. Chiwesaj lo chilaʼ 12 abʼaj tekʼuriʼ chiya pa ri lugar chiʼ kekanaj kan ri winaq chaqʼabʼ. Tekʼuriʼ chiʼ kketa ri iwalkʼwal su kraj kubʼij ri täq abʼaj, kibʼij chike che are kraj kubʼij chiʼ xbʼin ta chi ri jaʼ chiʼ xqʼax ri koxon rech ri utaqonik ri Ajawaxel pa ri Jordán. ¡Ri täq abʼaj kuya jun natbʼalil che are ri Ajawaxel xubʼan wariʼ!› Xchaʼ. Josué xuqujeʼ xresaj lo ri 12 abʼaj pa ri nimalaj jaʼ jachiʼ, o ni, e kʼo wi ri ajkojol tabʼal toqʼobʼ.

Kʼisbʼal re ri Josué xubʼij chike ri achijabʼ ri keqan ri koxon: ‹Chixel lo pa ri Jordán›. Chiʼ xkebʼan wariʼ, ri nimalaj jaʼ xumaj chi ri ubʼe.