AKARAIA ana ra! te aere atura to Iseraela ki tetai tua i te Kauvai Ioridana! Teea ra oki te vai? No te mea e maata te ua e topa ana i teia tuatau o te mataiti, e kua ki te kauvai i nga miniti ua akenei. Teianei ra kare takiri e vai! E te aere atura to Iseraela ki tetai tua na runga i te one maro mei ta ratou rai i rave i ko i te Tai Muramura! Eaa ra tei tupu ki te vai? Ka akara tatou.

Te tae anga te taime ka aere to Iseraela ki tetai tua i te Kauvai Ioridana, teia ta Iehova i tuatua kia Iosua kia akakite ki te iti tangata: ‘E apai te kau taunga i te aruna koreromotu, e aere na mua ia matou. Me tuku ratou i to ratou vaevae ki roto i te vai o te Kauvai Ioridana, kare te vai e tae akaou.’

I reira kua rave te kau taunga i te aruna koreromotu, e kua apai i te reira na mua ake i te iti tangata. Te tae anga ratou ki Ioridana, kua takai tika atu te kau taunga ki roto i te vai. E ririnui tikai te vai e te oonu. Inara i te amiri anga to ratou vaevae i te vai, kua akamutu te vai i te tae! E temeio tikai! I mua roa i te kauvai kua tapu a Iehova i te vai. Kare i roa ana, kua maro te vai i roto i te kauvai!

Kua aere tika atu te kau taunga e apai ra i te aruna koreromotu ki rotopu i te kauvai maro. Te kite ra koe ia ratou i roto i te tutu? Ia ratou e tu ra i reira, kua aere pouroa atu to Iseraela ki tetai tua i te Kauvai Ioridana na runga i te one maro!

Te tae anga te katoatoa ki tetai tua, kua tuatua a Iehova kia Iosua e kia akakite ki te au tangata ririnui e 12: ‘Aere ki roto i te kauvai te ngai e tu ra te kau taunga e te aruna koreromotu. Koi e 12 toka, e patu i te reira ki te ngai ta kotou pouroa ka noo i teia po. I reira, a te tuatau ki mua me ui mai ta kotou tamariki i te aiteanga o teia au toka, akakite kotou kia ratou e kua akamutu te vai i te tae i te apaiia anga te aruna koreromotu a Iehova ki tetai tua i Ioridana. Ka riro teia au toka ei akamaara ia kotou i teia temeio!’ Kua akanoo katoa a Iosua e 12 toka i te ngai i tu ei te kau taunga i roto i te kauvai maro.

I te openga kua akakite a Iosua ki te kau taunga e apai ra i te aruna koreromotu e: ‘Aere mai ki vao no roto i Ioridana.’ E i te rave anga ratou i teia, kua tae akaou mai te vai.