Tantara 45

Fiampità amy Ranon’i Jordana

HENTEO fa mitsàky Ranon’i Jordana io Israelita reo! Fe nanaìa ty rano? Niavy bibike ty ora tamy tao io, ka nifeno maré ony io fotoa kelikele talohan’io. Fe fa tsy misy rano sasy ty eo henany zao! Afake nandeha tamy tany maike manahake ty niampitàn-droze Riake Mena iny Israelita reo! Nanaìa iaby ty rano teo? Ndao ho henteantsika ty mikasike raha zay.

Laha fa niavy ty fotoa tokone hiampitàn’Israelita reo Ranon’i Jordana io, le novolànin’i Jehovah Josoa mba hivòla tamy vahoake reo hoe: ‘Tokone hanonjo fiara’ty fanekea io ty mpisoro sady tokone handeha alohantsika eo roze. Ka laha vo mikasike amy rano io avao ty tombon-droze, le ho ritsy rano io.’

Norambesi’ty mpisoro fiara’ty fanekea iny, ka nitari-dala vahoake reo roze. Laha fa niavy ta-Jordana teo roze, le avy le nilitse tanaty rano tao. Nahery sady lalike biby rano io. Fe laha vo nikasike rano io avao ty tombo mpisoro reo, le nanomboke nijàno tsy nandeha sasy rano iny! Fahagagà raha zay! Nosakànan’i Jehovah tsy handeha ty rano baka anabo eny. Ka, tsielatsiela avao le niritsy ty rano tamy ony io teo!

Avy le nandeha tanivo ony maike iny teo mpisoro nanday fiara’ty fanekea reny. Hitanao va roze amy sary eo io? Mijàno eo roze, sady tsy mihetsike, fa Israelita reny mandeha soa amy tany maike amy Ranon’i Jordana iny eo!

Laha fa baka niampita rano iny iaby Israelita reo, le nivòla tamin’i Josoa Jehovah mba hanirake lahilahy matanjake 12, ka hoy ty asan’i Josoa hoe: ‘Ndahàna nareo mandeha amy ony, amy toera nitsangàna mpisoro, noho nitanjahan-droze fiara’ty fanekea iny. Mangalà vato 12, ka apetràho ami’ty toera hiroroanareo amy halike. Ka, laha fa manontany anareo ty dika vato reo ty ananareo laha fa afara, le hambaranareo an-droze fa niritsy Ranon’i Jordana iny laha fa niampita teo fiara’ty fanekean’i Jehovah iny. Vato reo ro hahatiarovanareo fahagagà io!’ Nametrake vato 12 tamy toera nitsangàna mpisoro reny teo koa Josoa.

Tamy farany le hoy Josoa tamy mpisoro nanday fiara’ty fanekea reny: ‘Miboàha amy Jordana ao ami’zay nareo.’ Ka laha vo nanao raha zay roze, le niakatse ndraike rano iny.

Josoa 3:1-17; 4:1-18.