BUKA, ema-Israyeli sekawela uMfula iJordane. Aphi emanti? Lomfula bewugcwele kakhulu ngemuva kwesikhashana nje, ngoba litulu lina kakhulu ngalesikhatsi semnyaka. Kodvwa nyalo emanti awasekho kuwo, futsi nema-Israyeli sekahamba emhlabatsini lowomile njengoba kwenteka naseLwandle loluBovu. Ashonephi lamanti? Ase sibone.

Kwatsi nasekufike sikhatsi sekutsi ema-Israyeli ewele uMfula iJordane, Jehova watsi Joshuwa akatjele bantfu kutsi: ‘Baphristi kumelwe batsatse libhokisi lesivumelwane bahambe embikwabo. Kutawutsi nabafaka tinyawo tabo eMfuleni iJordane, emanti atakuma angasageleti.’

Baphristi balitsatsa lelibhokisi lesivumelwane, bahamba embikwebantfu. Batsi nabefika eMfuleni iJordane, bangena ekhatsi emantini bema khona. Lamanti abegeleta kakhulu futsi ashona. Kodvwa kwatsi ngemva kwekuba sebafake tinyawo tabo, emanti ayekela kugeleta. Bekusimangaliso lesi! Jehova wenta emanti labechamuka ngenhla aba yindvundvuma. Ngekushesha aphela onkhe emanti emfuleni.

Baphristi lebebatfwele libhokisi lesivumelwane bema ekhatsi endzaweni leyomile yemfula. Uyababona yini kulesitfombe? Njengoba bemile lapho, sonkhe sive sema-Israyeli sewela uMfula iJordane sihamba emhlabatsini lowomile.

Kwatsi sebewelile bonkhe, Jehova watsi kuJoshuwa akatjele emadvodza langu-12 lanemandla loku: ‘Ngenani emfuleni niye lapho kume khona baphristi labaphetse libhokisi lesivumelwane. Nibofike nitsatse ematje langu-12, niwatfwale niyowabeka lapho nitawufike nihlale khona. Uma bantfwana benu banibuta kutsi asho kutsini lamatje, nibobatjela kutsi emanti ema kugeleta ngalesikhatsi kuwela libhokisi lesivumelwane laJehova eJordane. Lamatje atawusikhumbuta ngaleso simangaliso.’ Joshuwa waphindze wabeka ematje langu-12 lapho labaphristi bafike bema khona eceleni kwemfula.

Ekugcineni Joshuwa watjela labaphristi labebaphetse lelibhokisi lesivumelwane loku: ‘Phumani emfuleni iJordane.’ Kwatsi nasebaphumile, emanti acala kugeleta futsi.